Монгол Улсад нийтийн аж ахуйн салбар үүсэж хөгжсөний 90 жилийн ойн баярыг тохиолдуулан Монгол Улсын Ерөнхийлөгчийн зарлигаар  Монголын орон сууц нийтийн аж ахуйн үйлчилгээний ажилтны үйлдвэрчний эвлэлийн холбооны дэд дарга, тус газрын ахмадын хорооны дарга  Ш.Содномцэрэнд Үйлчилгээний Гавьяат ажилтан цол хүртээв.

Үйлчилгээний Гавьяат ажилтан Ш.Содномцэрэн нь 1981 онд Орон сууц нийтийн аж ахуйг удирдах газарт зааварлагчаар ажлын гараагаа эхэлж, салбартаа 41 жил ажиллажээ.

          Ажиллаж байх хугацаандаа инженерийн шугам сүлжээний ажиллагааг хангах, орон сууцны гадна, дотор инженерийн шугам сүлжээний ашиглалт, засвар үйлчилгээний ажлыг шуурхай болгох, техникийн бодлогыг хэрэгжүүлэхэд чиглэсэн ээлжийн инженерийн хяналтын системийг боловсронгуй болгосон. Төлбөрт үйлчилгээний үнэ тариф, үйлчлэгчийн үйлчилгээ, ажлын норм, норматив боловсруулах ажлын хэсгийг удирдан ажилласан.  Мөн Орон сууц хувьчлалын болон орон сууцны багц хуулийн анхны  төслийг боловсруулахад гардан оролцож, Эрчим хүчний тухай хууль, Хот суурины  ус хангамж ариутгах татуургын  ашиглалтын тухай хууль болон дээрх багц хуулиудын  нэмэлт өөрчлөлтүүдэд санал хүргүүлсэн нь нэмэлтээр батлагдаж, мөрдөгдөж байгаа.

Тэрбээр өөрийн бүтээлч санал санаачилгаар Монгол Улсад нийтийн аж ахуйн салбарын тогтвортой хөгжлийг цогцлоох, Нийслэлийн орон сууц нийтийн аж байгууллагуудын үйл ажиллагаа, ажил үйлчилгээг шинэчлэн сайжруулахад бодитой хувь нэмэр оруулан ажиллахын зэрэгцээ салбарын ахмад залуу үеийн нийт ажилтнуудын хөдөлмөрлөх эрх ашгийн төлөө тууштай тэмцэж, хөдөлмөрчдийн эв санааны нэгдлийн хангахад салбарын ажилтнуудаа ямагт  удирдан ирсэн манлайлагч ахмад ажилтан юм.