Тулгар төрийн 2230 жил, Их Монгол Улс байгуулагдсаны 815 жил, Үндэсний эрх чөлөө, тусгаар тогтнолоо сэргээн мандуулсны 110 жил, Ардын хувьсгалын 100 жил, орчин цагийн худалдааны салбар үүсэж хөгжсөний 100 жилийн ойг тохиолдуулан Монгол Улсын Ерөнхийлөгч У.Хүрэлсүхийн зарлигаар төрийн дээд шагнал, одон, медаль гардуулж байна.

Энэ үеэр Монгол Улсын Хөдөлмөрийн баатар цолоор шагнуулсан Архангай аймгийн Ихтамир сумын малчин, Хөдөө аж ахуйн ухааны академийн гишүүн, академич Ц.Доржсүрэн сэтгэгдлээ хуваалцсан юм. Тэрбээр

“Төрүүлж, өсгөсөн эцэг, эх, төр засагтаа их баярлаж байна.

           Би 16 настайгаасаа л мал дээр гарч, 52 жил мал маллаж байна. 52 жилийн турш мал маллахдаа 2005 онд улсын сайн малчин болж, 2012 онд улсын хэмжээнд 1500 сарлаг тоолуулж, 1000 сарлагны баяр хийж байлаа.

           Архангайчууд, тамирчууд, хөхнуурчууддаа “Баярлалаа” гэж хэлмээр байна. Залуу малчдадаа малаа сайн маллахыг зөвлөж, миний энэ амжилтад хүрэхийг хүсье” гэлээ.