Эрүүл мэндийн яамны Шуурхай удирдлагын хэлтсийн дарга асан Д.Нарангэрэл Эрүүлийг хамгаалахын гавьяат ажилтан  цол тэмдэгээр шагнуулав. Тэрбээр энэ үеэр баярын сэтгэгдлээ хуваалцсан юм. 

       Д.Нарангэрэл "Эрүүл мэндийн салбарт 30 гаруй жил, төрийн захиргааны төв байгууллагад 20 гаруй жил ажиллалаа. Халдварт өвчний судлалаар бодлогын бичиг баримт боловсруулах ажилд олон жил ажилласан. Сүүлийн үед Антикорона баг маш сайн ажиллаж, коронавирусийн эсрэг хамтдаа тэмцсэн. Миний авч буй шагнал бол Антикорона багийнхны минь авч байгаа шагнал юм. Би удам дамжсан их эмч хүн. Ээж минь эх баригч байсан. Олон хүүхэд өлгийдөн авсан ээжийнн минь буян заяа надад ирж байна . Би 40 гаруй халдварт өвчний үед ажилласан. Манай Антикорона баг цар тахал гарсан цагаас эхэлсэн үед анх маскаа сайн зүүж, гараа угаах, хүн хоорондын зайг баримтлах зэргийг олон нийтэд мэдээлсэн. Үүний үр дүнд коронавирусийг хохирол багатай туулахад нөлөөлсөн гэж үзэж байгаа" хэмээлээ.