АТГ-ын мөрдөгчид хилээр 20 кг алт оруулсан гэх мэдээлэл бий. Энэ талаар Авлигатай тэмцэх газрын Хэвлэл мэдээлэл, олон нийттэй харилцах ажилтан, комиссар Н.Тэмүүлэнгээс тодрууллаа. Тэрбээр “АТГ-ын мөрдөгчид улсын хилээр 20 кг алт оруулж ирсэн гэдэг нь худал. Алигатай тэмцэх газрын нэр бүхий мөрдөгчид арваннэгдүгээр сард Турк Улсад олон улсын санхүүгийн сургалтад оролцсон. Сургалтад оролцоод буцаж явахдаа онгоцонд мөрдөгч С нь байрныхаа танил ах П гэгчтэй тааралдсан байна. Ингээд онгоцноос буухдаа түүний гуйлтаар гар тээшийг нь авч, гаалийн хяналтын бүсэд орсон. Гаалийн шалгалтаар уг гар тээшнээс 20 орчим кг мөнгөн болон монетон ээмэг, бөгж, зүүлт зэрэг гоёл чимэглэлийн зүйлс гарч ирсэн. Гар тээшний эзэн П нь гаалийн татвараас зайлсхийх зорилгоор гар тээшээ мөрдөгч С-д шилжүүлсэн нь тогтоогдсон. Иргэн П татвараас зайлсхийсэн үйлдэлдээ 33.7 сая төгрөгийн нөхөн татвар төлсөн. Харин мөрдөгч С-ийг албаны нэр хүндэд сөргөөр нөлөөлсөн хэмээн ажлаас нь чөлөөлсөн. Ингээд гаалийн байцаагч тухайн тээшний эзнээр гаалийн бүрдүүлэлтийг нөхөн хийлгэж, Зөрчлийн тухай хуулиар торгуулийн арга хэмжээ авсан байна” гэлээ.