Аавдаа хүчирхийлүүлсэн байж болзошгүй хоёр настай охины өмгөөлөгч Л.Баттогтох өнөөдөр хэвлэлийнхэнд мэдээлэл хийлээ.

     Тэрбээр "Хуулийн хүрээнд авч үзэх юм бол эх сурвалж гэж бий. Тухайлбал, Архангай аймгийн эмнэлгийн эмч, мэргэжилтнүүд "Охиныг онгон хальсны урагдалттай байна" гэж үзсэн. Дараа нь тус аймгийн шинжээч эмч нар болон дүүргийн эмч нар үзээд мөн адил хариу хэлсэн. Тэгэхээр Шүүх шинжилгээний үндэсний хүрээлэнгээс гаргасан сүүлийн хоёр дүгнэлт эргэлзээтэй байна. Тиймээс бид Хянан шийдвэрлэх ажиллагааны журам зөрчигдсөн гэж үзэж байна. Мөрдөн шалгах албаны тусгай субъект шалгадаг байгууллагад энэ хэргийг шалгуулмаар байна. Ингэхдээ гэрчээр анхлан шинжилсэн Архангай аймгийн шинжээч эмчийг дуудах байх. Мөн дүүргийн эмнэлгийн эмч нараас асууж байж бодит үр дүн гарах ёстой. Эрүүгийн хэрэг, хянан шийдвэрлэх ажиллагаанд журам зөрчсөн асуудал гарсан. Учир нь, цагдаа болон прокурорын байгууллага охины ээжийг хохирогч буюу хууль ёсны төлөөлөгчөөр томилоогүй. Өөрөөр хэлбэл, хоёр настай охинд өөрийгөө хамгаалах ямар нэгэн эрхзүйн субъект байхгүй байна" гэв.