Төв талбайн сүлд модны гэрлийг асаах үйл ажиллагаа өнөөдөр боллоо. Тус үйл ажиллагаанд Нийслэлийн Засаг даргын хүний хөгжил, нийгмийн бодлогын асуудал хариуцсан орлогч З.Төмөртөмөө, Нийслэлийн Засаг даргын нийгмийн бодлогын хөгжлийн дарга И.Баатархүү, нийслэлийн шилдэг гэр бүлүүд оролцож, мэндчилгээ дэвшүүллээ.

  Энэ үеэр Нийслэлийн Засаг даргын хүний хөгжил, нийгмийн бодлогын асуудал хариуцсан орлогч З.Төмөртөмөө "Шинэ жилийн баярыг сүлд модгүйгээр төсөөлөхийн аргагүй. Айл бүр модоо засдаг. Тэгвэл Улаанбаатар хотын хувьд уламжлал болсон төв талбайн модоо хүндэтгэн гэрлээ асаадаг уламжлалтай. Энэ дагуу сүлд модны гэрэл асах үйл ажиллагаа боллоо. Өнгөрсөн хоёр жилийн хугацаанд Монгол Улс төдийгүй дэлхий нийтээрээ хэцүү цаг үед ажиллаа. Эрүүл мэнд болон Онцгой байдлын ажилчдын ачаар өнөөдөр цаг үе харьцангуй гайгүй болж байна. Энэ жилийн тухайд Засгийн газраас төрийн байгууллагын шинэ жилийг хориглож, хувийн байгууллага тэмдэглэх  шийдвэрийн дагуу мөрдөн, аль болох байгууллага, хамт олноо шагнаж урамшуулах ажил зохион байгуулж байна.

 Өнөөдөр гэрэл нь асаж байгаа энэхүү сүлд мод бол зургаан жилийн өмнөх мод. Бид шинэ сүлд модонд төсөв тавих нь бүү хэл хүнд цаг үеүүд өнгөрлөө. Харин ирэх жил модоо шинэчилж, өөр олон шинэ арга хэмжээ зохион байгуулах төлөвлөгөөтэй байгаа. Энэ жил бид өөрсдийнхөө боломж бололцоогоор хуучин сүлд модоо засаж, гэрлийг нь асаалаа. Иргэдийн хувьд мэдээж  талбайн сүлд модыг олон улс болон орон нутагтай харьцуулсан шүүмжлэл явж байгаа харагдсан. Мэдээж шүүмжлэлийг хүлээн авч, ирэх жил шинэчилнэ гэдгээ албан ёсоор мэдэгдэж байна" гэв.