Баян-Өлгий аймгийн нутаг дэвсгэрт энэ оны эхэнд нярай хүүхдээ хоол тэжээлийн дутагдалд оруулж, нас барахад хүргэсэн хэрэг гарчээ. Баян-Өлгий аймаг дахь сум дундын Эрүүгийн хэргийн анхан шатны шүүхээс талийгаачийн төрсөн эцэг С-д гурван жилийн хорих ял, төрсөн эх М болон С-ын эхнэр М нарт хоёр жилийн хорих ял оноосон байна.

Хэргийг эргэн сануулбал, 52 настай С нь гэр бүлээс гадуурх харилцаатай байсан 21 настай Е-г жирэмслүүлсэн. Харин хүүхэд төрмөгц төрсөн эх Е нь С болон түүний эхнэр М-д нярайн хүүхдээ албан бичиг баримтгүй үрчилсэн байдаг. Нярай Е болон С-ын гэрт очсон өдрөө хэт их уйлснаас болж амьсгалын дутагдалд орсон, мөн хоол тэжээлийн дутагдалд орсноос нас барсан дүгнэлт гарсан. Улмаар нярайн төрсөн эцэг С, төрсөн эх Е, С-ын эхнэр М нарыг Эрүүгийн хуулийн 16.11 дүгээр зүйлийн “Хүүхдийг асран хамгаалах үүргээ үл биелүүлэх гэмт хэрэг”-т шалгаж байсан юм.