"Болор цом-38" наадмын эзэн, яруу найрагч О.Цэнд-Аюушийг төрөлх нутгийнхан нь буюу Завхан аймгийн Эрдэнэхайрхан сумын нутгийн зөвлөлөөс  57.5 сая төгрөгөөр шагнажээ. Энэ талаар тэрбээр  өөрийн цахим хуудастаа "Эрдэнэхайрхан сум, нутаг ус, уул хайрхан, нуур далайгаас минь төрсөн нэртэй, төртэй ах, эгч нар Сартуул хүний хэлсэн үгэндээ эзэн болдогийн жишээг мөхөс дүүдээ харууллаа. Нэг үгээр хэлэхэд энэ шагналын цаана аугаа их сэтгэл зүрхнүүд оршиж байна гэж би бодож сууна. Баярлалаа, Эрдэнэхайрхан сум, баярлалаа  унасан нутаг, угаасан усны ах, эгч нар, ард олон минь" хэмээн сэтгэгдлээ илэрхийлжээ.

   Яруу найрагч О.Цэнд-Аюуш нь өнгөрсөн аравдугаар сард "Гомдож үзээгүй юм шиг амьдрах" яруу найргийн дөрөв дэх номоо гаргасан бөгөөд мөн "Тас чамайг тасчих болтугай" үргэлжилсэн үгийн анхны номоо уншигчдад хүргэсэн юм. Тэрбээр өмнө нь  "Манан дундуур" , "Гунигт аз" "Аглагт гэрэлтэнэ" зэрэг гурван шүлгийн түүвэр хэвлүүлсэн юм.