Я.Цэвэлийн "Монгол хэлний товч тайлбар толь"-ийн дөрөв дэх хэвлэлийг Ерөнхийлөгч ивээн тэтгэн хэвлүүлжээ. Тодруулбал, уг "Монгол хэлний товч тайлбар толь" ном нь  1966 оноос хойш дэлхийн олон оронд гарсан монгол хэлтэй холбогдол бүхий тольд үндсэн хэрэглэгдэхүүн болсоор ирсэн байдаг бөгөөд Я.Цэвэлийн ногоон толь гэдгээрээ алдаршсан. 

  Энэхүү бүтээлийг Я.Цэвэл гуайн хүү нэрт эрдэмтэн Ц.Шагдарсүрэн 2013, 2021 онд хоёр удаа дахин хэвлүүлсэн бөгөөд аавынхаа 30 мянган үгтэй толийг 50 мянга гаруй үгийн сантай болгож нэмж дэлгэрүүлсэн байдаг.  Мөн уг  ногоон толийг Өвөрмонголд 2002 онд босоо бичгээр хэвлэсэн байдаг байна.

   Я.Цэвэл эрдэмтэн 50 гаруй жил эрдэм шинжилгээний ажил хийхдээ Монгол хэлний үгийн сан, найруулга зүй, түүх, угсаатны судлал, түүхэн газарзүй, соёл, Монголын шинжлэх ухааны түүх, сурган хүмүүжүүлэх салбараар ажиллаж бие даасан ном, товхимол, өгүүлэл олныг нийтлүүлж байлаа. Мөн олон нийтийн хүртээл болж хэвлэгдэн гараагүй бүтээл ч их байгаа аж.