Гэрээсээ гараад сураггүй алга болсон иргэний цогцсыг олжээ. Тодруубал, Ховд аймгийн Дөргөн сумын Өгөөмөр багийн харьяат 38 настай иргэн Э арванхоёрдугаар сарын 06-ны өдрийн 23:00 цагт Дөргөн сумаас Агууш-Арал гэдэг газар руу мотоциклтой яваад сураггүй алга болжээ. Энэ тухай дуудлага Ховд аймгийн Онцгой байдлын газарт өчигдөр ирсэн байна. Дуудлагын дагуу тус аймгийн Эрэн хайх, аврах ангийн алба хаагчид, сумын иргэдтэй хамтран иргэний алга болсон газарт очжээ.

  Эрлийн багийнхан Далай нуурын эргээс мотоциклийг олж, шумбалт хийсэн байна. Сураггүй алга болсон иргэний цогцсыг нуурын эргээс хоёр километр, таван метр гүнээс олж, аймгийн Цагдаагийн газрын мөрдөн байцаагчид шилжүүлэн өгсөн байна.