Сэлэнгэ аймгийн Цагааннуур суманд өнгөрсөн сарын 8-нд хоёр сартай нярай амиа алдсан хэрэг гарсан. Тухайн үед нярайн хамрыг хэсэг ухагдсан, толгойн зулайн хэсэгт олон тооны цэгэн шарх үүссэн байдалтай байсан бөгөөд урьдчилсан байдлаар хамрын хэсгийн зөөлөн эдийг муур идсэний улмаас амиа алдсан байж болзошгүй гэсэн дүгнэлт гарсан юм.

          Тэгвэл энэ талаар ЦЕГ-ын Хэвлэл мэдээллийн төвийн дарга, хурандаа Б.Баатархүү мэдээлэл өгөхдөө “Тухайн муурыг хоёр хоногийн өмнө гудамжаас олж, гэртээ оруулж байлгаж байсан гэх мэдээлэл байгаа. Шүүх шинжилгээгээр хохирогч хүүхдийг бүтэлтээс болж нас барсныг нь тогтоосон. Биед нь учирсан ил харагдах шархууд нь муурнаас үүдсэн байж болзошгүй нөхцөл байдалд байгаа. Үүнд задлан шинжилгээний нарийн дүгнэлтүүд гарна. Хохирогчийн юунаас болж амиа алдсан, шарх юунаас болж үүссэн зэрэг холбогдох шалталтын ажиллагааг үргэлжлүүлж байна” хэмээсэн юм.