Коронавирусээр өвчлөөд эдгэрсэн хүмүүсийн хувьд уушгины рентген зураг авахуулах нь сөрөг нөлөөтэй эсэх, мөн хэдий хугацааны дараа рентген зураг авахуулвал тохиромжтой талаар дүрс оношилгооны эмч Г.Ариунболдтой ярилцлаа.

      Коронавирусээр өвчлөөд эдгэрсэн иргэдийн хувьд уушгины рентген зураг авахуулах сөрөг нөлөөтэй юу?

        -Рентген нь цацраг туяа учир хүний биед хортой гэхдээ тухайн хүнд шууд ямар нэгэн нөлөө үзүүлнэ гэсэн зүйл байхгүй. Нэг удаа цээжний рентген зураг авахуулахад 10 өдрийнхөө байгалиас авах туяаг авсантай тэнцүү гэж ойлгож болно. Гэхдээ хүн өвдөж байгаа л юм чинь оношилгоо хийлгэж цээжний рентген зураг авхуулж байж дотор эрхтэн гэмтсэн гэмтээгүй, үрэвссэн байна уу үгүй юу гэдгийг харж ямар эмчилгээ хийлгэх шаардлагатай байгааг мэдэх болно. Хэдий цацраг туяа хортой ч гэсэн өвчнийг оношилж байгаа учир авахуулах л хэрэгтэй. Ялангуяа ковидын үед эдгэрсний дараа цээжээр хатгуулах зовиур их байгаа тийм учираас рентгенд харуулж хатгалгаа болсон байгаа эсэх,  уушги хэр хэмжээнд гэмтсэн байгааг мэдэж болно.

      Коронавирусээр өвчилсөн хүний уушги рентген зурагт ямар байдалтай харагддаг вэ? Ер нь жилд хичнээн удаа рентгенд харуулж болдог вэ?

        -Корона вирус бол хүний уушгийг хамгийн их гэмтээдэг тэр тусмаа хүний уушгины хамгийн арын хэсэг буюу захын байрлалд ихээхэн нэвчдэс үүсгэж байгаа. Ковидоор хүнд өвчилсөн хүнд  хатгаа үүссэн байдаг.  Хатгааны үлдэгдэл нь сорвижоод хатуурсан юм шиг зураглалтай харагдана. Ер нь эмч рентген зураг авахуулах шаардлагатай гэж үзсэн бол хэдэн ч удаа харуулж болно.

       Эдгэрснээс хэд хоногийн дараа рентгенд харуулж болох вэ?

         -Тухайн хүний биеийн байдал болон эмчлэгч эмчээс шалтгаална. Гэхдээ эмчилгээ хийж дууссаны дараа ойролцоогоор 5-10 хоногийн дараа харуулвал зүгээр.  Мөн урьдчилан сэргийлэх үүднээс ч харуулж болно ер нь жилд гурван тун туяа зураг авахуулахад аюул багатай гэж үздэг.

       Коронавирусээр хөнгөн өвчилсөн хүмүүс заавал рентген зураг авахуулахгүйгээр уушгиа эмчлэх арга байдаг уу?

            -Хүн болгон рентгенээр харуулах албагүй гэхдээ цээжээр нь хатгуулах болон амьсгаадах, ханиалгах, тайван үед амьсгаа давчдаж байвал яаралтай нарийн мэргэжилийн эмчид хандаж үзүүлэх шаардлагатай уушигны хатуурал үүссэн байж болзошгүй. Харин хөнгөн өвдсөн хүмүүсийн хувьд агаарт сайн гарах, витамин өндөр тунгаар хийлгэх дархлаагаа сайн дэмжих шаардлагатай.

       Уушигны хатууралт үүсэх нь хүний биед хэр хор хөнөөлтэй вэ?

           - "Ковид-19"-өөр өвчлөөд эдгэсний дараа уушгины хатуурал үүссэн хүн амьсгалын дутагдалд ордог. Уушгины хатуурал нь уушгины эдийг эргэшгүй өөрчлөлтөнд оруулж хийн солилцоо явуулах үйл ажиллагаа алдагдана.Тухайн хүн байнга амьсгааддаг, ачаалал даах чадвар муудах эрсдэлтэй юм. Түүнчлэн, уушгины хатуурал үүссэн бол эргээд бүрэн сэргээгдэхгүй.

Дараах зурагт корона вирусээр хөнгөн болон дунд, хүндээр өвчилсөн иргэдийн уушигны рентген зурагны харьцуулсан харьцуулалтыг хүргэж байна.

Тус зургаас харахад хар харагдаж байгаа нь эрүүл харин цагаарч харагдаж байгаа нь уушги гэмтсэн байгааг харж болох юм. 

М.Жавхлан