Монгол-Япон эмнэлгийг ЭМЯ-ны мэдлээс АШУҮИС-ийн харьяанд шилжүүлэх ёслолын ажиллагаа өнөөдөр тус эмнэлэгт боллоо. Япон-Монгол Улсын Засгийн газрын хамтын ажиллагааны хүрээнд Япон улсын буцалтгүй тусламжаар баригдаж, 2019 оны зун ашиглалтад орж үйл ажиллагаагаа эхлүүлсэн энэ эмнэлэг нийслэлийн Баянзүрх дүүргийн дөрвөн хорооны иргэдэд эрүүл мэндийн тусламж үйлчилгээ үзүүлж байв.

     2021 оны дөрөвдүгээр сараас хойш 150 ор дэлгэн коронавирусийн халдварын улмаас хүндэрсэн өвчтөнүүдийг хүлээн авч, тусламж үзүүлж байжээ. Одоогийн байдлаар 64 орыг ковидтой иргэдэд, бусад орыг мэс засал, эрчимт эмчилгээ зэрэг үндсэн тусламж үйлчилгээндээ зориулан ашиллаж байна.  

      Энэ үеэр АШУҮИС-ийн захирал Н.Хүрэлбаатар,  Их сургуулийн эмнэлэг цаашид сургалт, эрдэм шинжилгээ судалгааны ажил, эмнэлгийн тусламж үйлчилгээ гэсэн гурван чиглэлээр цогц үйл ажиллагаа явуулна. Энэ эмнэлгийн эмч, мэргэжилтнүүд болон АШУҮИС-ийн багш нарын цалингийн зөрүү 60 хувьтай байна. Ирэх аравдугаар сард эмнэлгийн эмч, мэргэжилтнүүдийн цалинг 15 хувиар нэмнэ.

     Ийн үе шаттайгаар нэмэгдүүлж, их сургууль, эмнэлгийн ажилтнуудын цалинг ижил түвшинд хүргэхээ мэдэгдэхэд эмч, мэргэжилтнүүд алга ташиж, талархлаа илэрхийлэв. Мөн тэрбээр Их сургуулийн эмнэлэгт цаашид магистр, доктор, резидент эмчийн болон мэргэжил дээшлүүлэх зэрэг бүх шатны сургалтыг дадлагатай хослуулан явуулах орчин нөхцөл бүрдлээ хэмээн онцолсон юм. БШУ-ы сайд Л.Энх-Амгалан, Монгол Улсад их сургуулийн эмнэлгийн тогтолцоог бүрдүүлэх шийдвэр гарч буй түүхэн өдөр тохиож байна. Улс орон эрүүл мэндийн хамгийн чанартай тусламж үйлчилгээг үзүүлэхийн тулд их сургуулийн эмнэлгээ бэхжүүлдэг. Их сургуулийн эмнэлэгт хамгийн сайн чадварлаг профессорууд, багш, судлаачид ажилладаг учир улсынхаа эрүүл мэндийн салбарыг манлайлж явдаг. Тиймээс их сургуулийн эмнэлгийг бүх талаар дэмжин ажиллах болно. Австрийн засгийн газрын 7.5 сая долларын санхүүжилтээр 2022 онд их сургуулийн эмнэлэгт тоног төхөөрөмжийн шинэчлэл хийнэ.

     Эрүүл мэндийн тусламж авах зорилгоор Монгол Улсаас жилд 120-140 сая доллар гадаад руу урсаж байна. Энэ их мөнгөн урсгалыг Монголдоо үлдээх их сургуулийн эмнэлэг голлох үүрэгтэй ажиллана гэж бодож байна. Нэг зүйлийг онцолж хэлэхэд, Монгол-Япон эмнэлгийн эмч, мэргэжилтнүүдийн цалинг гурван жилийн дотор АШУҮИС-ийн багш нарын цалингийн түвшинд хүргэх үүргийг АШУҮИС-ийн захирал Н.Хүрэлбаатарт өгч, гурван жилийн дараа ирж, үүрэг даалгаврын биелэлтийн асуух болно гэлээ. Эрүүл мэндийн сайд С.Энхболд, Коронавирусийн халдварын үед салбарынхаа ачааг үүрэлцэж, халдвартай иргэдэд яаралтай тусламж, эрчимт эмчилгээний тусламж үзүүлж ажилласан Монгол-Япон эмнэлгийн хамт олонд талархал илэрхийлье. Цар тахлын эсрэг арга хэмжээнд АШУҮИС-ийн эрдэмтэн багш нар, судлаачид бодлогын зөвлөмж өгч, шүлсээр оношлох оношлуур бүтээн эрүүл мэндийн салбартаа онцгой үүрэгтэй ажиллаж байна. Монгол-Япон эмнэлгийг БШУЯ-д шилжүүлж, их сургуулийн эмнэлэгтэй болсноор цаашид төгсөлтийн дараах сургалтын чанарыг сайжруулна. Энэ чиглэлээр ЭМЯ, БШУЯ-тай хамтарч бодлогын шийдвэрүүд гаргах болно гэсэн юм. 

      Монгол-Япон эмнэлэгт эмч, сувилагч, эмнэлгийн мэргэжилтнүүд зэрэг 517 хүний орон тоотой ажиллаж байна. Тус эмнэлэгт АШУҮИС-ийн багш нар гэрээгээр ажиллаж байсан бол энэ шийдвэр гарснаар эмнэлгийн тасаг, их сургуулийн тэнхимүүд нэг бүтэц болон ажиллах орчин өнөөдрөөс бүрдэж буй юм.