Засгийн газрын хэрэгжүүлэгч агентлаг Гэр бүл хүүхэд залуучуудын хөгжлийн газраас есөн настай охины амиа алдсан хэрэг болон гэр бүлийн хүчирхийллийн асуудлаар мэдээлэл хийлээ. 

Гэр бүл хүүхэд залуучуудын хөгжлийн газрын ахлах мэргэжилтэн Ж.Азжаргал "Хүүхэд хамгааллын хуульд “Нийгмийн бүх орчинд хүүхдийн эсрэг хүчирхийллийг хориглосон” байдаг. Хүүхэд эрсдэлт нөхцөлд байгааг ажигласан, таамагласан, мэдсэн тохиолдолд иргэн хүн холбогдох байгууллагад заавал мэдээлэх чиг үүрэгтэй. Гэсэн ч тухайн есөн настай охин өмнө нь хүчирхийлэлд өртөж байсан талаарх мэдээллийг холбогдох хамтарсан багууд мэдээлээгүй. Улмаар анхан шатанд ажиллаж буй Цагдаагийн байгууллагын алба хаагчид тухайн гэр бүлийн асуудалд анхаарал хандуулж ажиллаагүй гэх мэт  урьдчилсан мэдээлэл байна. 2018 оны 11-р сард талийгаач охин алга болчихлоо гэсэн дуудлага 108 утсанд ирсэн байсан. Гэвч 2 цагийн дараа охин орон нутагт суудаг эмээтэйгээ утсаар ярихаар хажуугийн дэлгүүр рүү орсон байсан юм байна. Эцэг эх нь оллоо гэсэн хариу ирсэн байсан. 

Мөн өнгөрсөн зургаадугаар сард ГССҮТ дээр хүүхэд тоглоомноос унаад гараа гэмтээчихлээ гэж ээжтэйгээ очиж үзүүлж байсан юм билээ. Гэмтлийн эмнэлэг тухайн үед хавирга нь бороолоод эдгэж байгаа гэсэн мэдээллийг өгч байсан гэсэн мэдээлэл байгаа.

БЗД-ийн хөгжлийн газраас ажлын хэсэг гаргаж, баримт нотолгоотой мэдээлэл эсэхийг тодруулахаар ажиллаж байгаа. Хэрэв нийгмийн ажилтан тухайн гэр бүлтэй ажиллаагүй, мэргэжлийн ур чадвар байхгүй нь үнэн, дараагийн шатны байгууллагад мэдээлээгүй байвал бид цаашдаа нухацтай авч үзэх зайлшгүй шаардлагатай болно.

БЗД-ийн 23 дугаар хорооноос өгсөн урьдчилсан мэдээлэлд тухайн охины эгч болох 12 настай охин хөгжлийн бэрхшээлтэй. Мөн хоёр настай эрэгтэй дүүтэй. Ээж нь жирэмсэн буюу гурван хүүхэдтэй өрх байсан. Талийгаач охиныг хөгжлийн бэрхшээлтэй байсан гэх мэдээлэл байхгүй. Энэ он гарсаар 9126 хүүхдэд хүүхэд хамгааллын хувийн хэрэг нээсэн. Эдгээр хүүхдүүдийн эрх ямар нэг байдлаар зөрчигдсөн. Манай агентлагийн эрсдэлийн программд 21 мянга 400 хүүхдийн кэйс бүртгэгдсэн. Бид 7600 хүүхдийн хэрэг дээр ажиллаж, шийдвэрлэсэн" гэв.