Зуны сар гарсаар хэд хэдэн удаа хүчтэй бороо орсон. Усархаг борооны улмаас Улаанбаатар авто зам усанд автаж, гарах гарцгүй болтлоо үерт "хашигддаг" нь шинэ асуудал биш. Үе үеийн хотын удирдлагуудаас үерийн аюулаас урьдчилан сэргийлэх суваг, шуудуу, далан барихыг шаардаж ирсэн ч өнөөдрийг хүртэл энэ асуудлыг шийдэж чадаагүй байна. Нийслэлийн хэмжээнд 180 гаруй км далд хэлбэрийн борооны ус зайлуулах шугам сүлжээ байдаг. Авто замын гадаргуун дээрх усыг 2000 орчим худгаар дамжуулан авч зайлуулдаг талаар Нийслэлийн авто замын хөгжлийн газраас мэдээлсэн. Харамсалтай нь, 600 гаруй кт авто замтай Улаанбаатар хотод энэ бол тун хангалтгүй үзүүлэлт юм. Тэгвэл нийслэлд усархаг бороо орох бүрд үерт автдаг, цаашид ч их хэмжээний үер буух хамгийн эрсдэлтэй цэгүүдийг нэрлэж байна.

1.    Баянзүрх дүүрэг нэгдүгээр хороо, “Е mart” орчмын уулзвар.

2016 онд аадар борооны улмаас Баянзүрх дүүргийн нэгдүгээр хороо, “E mart” дэлгүүрийн дөрвөн замын уулзвар бүхэлдээ усанд автаж байсан билээ. Замаар зорчиж байсан автомашины "хамрыг" давсан их ус тогтож, зарим жижиг оврын автомашин усанд урсах байсныг Онцгой байдлын алба хаагчид гаргаж байсан. Тус хорооны оршин суугчид “E mart” дэлгүүр баригдаж эхэлсэнтэй холбон тайлбарлаж байв.

2.     Гэгээнтэн цогцолборын уулзвар.

2019 онд “Гэгээнтэн” цогцолборын уулзвар орчимд үер бууж, замыг хэсэгчлэн хааж байсан.

3.    Баянзүрх дүүргийн 26 дугаар хороо, Баянмонгол хороолол.

Хэдхэн хоногийн өмнө орсон аадар борооны улмаас Баянзүрх дүүргийн 26 дугаар хороо буюу Баянмонгол хорооллын зам бүхэлдээ усанд автаж, явган хүн байтугай жижиг суудлын тэрэг явахад хүндрэлтэй болсон агаад замын хөдөлгөөний ачаалал эрс нэмэгдэж, түгжрэл үүссэн. Өмнөх борооны усыг цэвэрлэж амжаагүй байтал бороо орсны улмаас нөхцөл байдал хүндэрч, усыг нь тийм хурдан хугацаанд сорох боломжгүй болжээ. Тиймээс явган зорчигчдын зарим нь хөлдөө гялгар тор углаж зарим нь тоосго эгнүүлэн тавьж зам гарч байсан билээ.

4.    Баянгол дүүргийн гуравдугаар хороо, “Барс” зах, Нарны гүүр орчим.

Жил бүрийн хүчтэй борооны улмаас Нарны гүүрийн ойролцоох зам үерт автдаг. Их хэмжээний үер буувал машины дугуй давсан ус тогтдог. Үүнээс үүдэн “Барс” зах, Нарны гүүр орчмоор явган хүн, авто машин зорчих ямар ч боломжгүй болдог.

5.    Баянзүрх дүүргийн 8, 12 дугаар хороо, Амгалан дулааны цахилгаан станцын орчим.

2019 онд орсон борооны улмаас Баянзүрх дүүргийн 8,12  дугаар хороо, Амгалан дулааны цахилгаан станцын ойролцоо үер бууж нэг гудамны зургаан айл усанд автаж байсан. Энэ талаар тухайн үеийн Нийслэлийн Засаг дарга С.Амарсайхан “Тухайн газар үерийн аюултай бүс. Иргэд өөрсдөө ирж, гэрээ бариад байна” хэмээж байсан.

6.    Сүхбаатар дүүргийн 20 дугаар хороо, Бэлх Сэлх орчим.

2018 онд Сүхбаатар дүүргийн Бэлхээс Сэлх хүртэл хэсгийн айлууд үерт автаж байсан. Үерийн улмаас зам цөмөрч, эвдэрсэн учир нийтийн тээврийн хөдөлгөөнийг хязгаарлаж байсан.

Нийслэлийн хүн амын 60 орчим хувь нь гэр хороолол буюу үерийн эрсдэлтэй бүсэд амьдарч байна. Энэ жил олон жилийн дунджаас илүү хур тунадас орно хэмээн Ус, цаг уур, орчны шинжилгээний газраас мэдээлсэн. Усархаг бороо удаан үргэлжилбэл Тасганы овоо, Чингэлтэй, Сонгинохайрхан уулын ус бууж, хот усанд автах аюул ойрхон байгаа. Ер нь үер усны аюулын талаар салбарын мэргэжилтнүүд жилийн жилд ярьдаг, мэдээлдэг. Гэсэн хэдий ч үеийн үед хотын дарга нар энэ асуудлыг тоож, тооцоолдоггүй. 2015 онд гаргасан Үерийн эрсдэлийн менежментийн судалгаагаар Улаанбаатарт их  хэмжээний үер болбол 80 сая ам.долларын эдийн засгийн хохирол учирна гэсэн дүн гарсан. Үерийн онц аюултай бүсэд 200 мянган иргэн, орон сууцны 600 барилга, 31 мянган гэр, 190 сургууль, цэцэрлэг болон эмнэлэг байрлаж байна. Сэлбэ голын дунд хэсэгт байдаг өндөр хүчдэлийн станц зэрэг дэд бүтцийн томоохон байгууламж ч үерийн бүсэд бий. Тиймээс жилийн жилд яригддаг, хамгийн эрсдэлтэй энэ асуудлыг нэн даруй шийдвэрлэхэд хаа хаанаа анхаарах хэрэгтэй байна.