“Хайр минь мөнх, үүрд хамтдаа байхдаа

Хоёр зүрх нэгэн хэмнэлээр цохилно

Хязгааргүй тэнгэрийн дор ч гэсэн

Хамгийн ариухан нь чи минь л байна” хэмээх MC Collection хамтлагтай хамтарсан “Түүндээ” дуугаар нь сонсогчдын сайн мэдэх дуучин Уранчимэг буюу Runaa-тай ярилцлаа.

-Энэ өдрийн мэнд хүргэе. Шинэ уран бүтээлүүдээ хэдхэн хоногийн өмнө сонсогчдодоо хүргэсэн шүү дээ. Сэтгэгдэл ямар байна?

                -Өнгөрсөн долоо хоногт хамтарсан уран бүтээл болон “Хайрт минь гэж дуудаач” гэх соло уран бүтээлээ гаргасан. Соло уран бүтээл маань “Ирээдүйгээс ирсэн зочид” киноны дуу болж гарсан учраас үнэхээр баяртай байгаа.

-Уран бүтээлийнхээ гараагаа эхэлсэн үеийнхээ талаар ярихгүй юу?

                -Noname хамтлагтай хамтран “Bye”, MC Collection хамтлагтай “Түүндээ” дуугаа хамтран гаргасан. 2024 онд анхны соло уран бүтээл “Миний од” дуугаа гаргасан.

-Анхны уран бүтээлийнхээ талаар яривал. Анхны дуугаа сонсогчдод хүргэх ямар байсан бэ?

                -Үнэхээр их догдлол, хэрхэн хүлээж авах бол гэсэн айдастай л байсан даа. Анхны уран бүтээл маань уянгын дуу байсан учраас хүмүүс сонирхож, таатай хүлээж авсан. Анхных гэдэг утгаараа маш их догдлол л мэдэрсэн дээ.

-Уран бүтээлээ хэрхэн хийдэг вэ?                        

                -Толгойд орж ирсэн мөртүүдээ шууд л тэмдэглэдэг. Дараа нь тэр үг, тэр үед мэдэрсэн мэдрэмжээрээ дууныхаа үгийг зохиодог. Нийгэмдээ эерэг зүйлсийг түгээдэг уран бүтээлч байхыг л хичээдэг дээ.

-“Миний од” дууныхаа талаар ярихгүй юу. Залуучуудын сонсох дуртай дуу болсон байна шүү дээ?

                -Анхны соло дуу учраас их хайртай. Хүн болгонд өөрийн гэсэн нэг од байдаг гэсэн утгыг хөгжмөөр илэрхийлэхийг хүссэн. Мөн анхны дуу минь хөөрхөн хөнгөн утгатай киноны дуу болсонд баяртай байдаг.

-“The Voice of Mongolia” шоуны талаар ярих уу. Тус шоу таны амьдралд хэрхэн нөлөөлсөн бэ?

                -2018 онд хамгийн анх “The Voice of Mongolia” шоу зохион байгуулагдсан. Дуулдаг, дуулах дуртай байсан учраас өөрийгөө сорихыг хүсэж тэмцээндээ орсон. Намайг дуулах үед дөрвөн шүүгч эргэж харна гэж огт бодоогүй. Хүмүүс миний дуулалтыг эергээр хүлээж авч дэмжсэн учраас цаашдын урлагийн замналд маань сайнаар нөлөөлсөн.

-Яагаад уран бүтээлч болохоор шийдсэн бэ. Багадаа энэ талаар бодож байсан уу?

                -Дуулж, бүжиглэх дуртай хүүхэд байлаа. Өөрийгөө дуучин биш бүжигчин болно л гэж боддог байлаа. Цаг хугацаа өнгөрөх тусам дуулах чадвар минь сайжирч, дуулж байгаадаа дуртай

болсон. Мөн бүжиглэж байхдаа авсан бэртэл маань дуучин болоход нөлөөлсөн. Урлагийн л хүн болох хүсэл мөрөөдөлдөө баттай зогссон шүү.

-Хүмүүс урлагийн хүн байх хэцүү гэж ярьдаг. Дуучин болох гараагаа амжилттай эхлүүлсэн залуу уран бүтээлчийн хувьд ямар бодолтой байгаа вэ?

                -Хэцүү зүйлгүй мэргэжил байхгүй шүү дээ. Хэдийгээр би мэргэжлийн сургуулийг нь төгсөөгүй ч энэ салбарт ажиллахад хэцүү ч дуртай зүйлээ хийж байгаа учраас аз жаргалтайгаар ажилладаг. Харин ч илүү хөгжүүлж, сайн байхыг хичээдэг.

-Уран бүтээлдээ ямар хэв шинжийг шингээхийг боддог вэ. Бусад уран бүтээлчдээс ялгарах онцлог нь юу вэ?

                -Бусадаас онцгойрох зүйл нь цөөхөн байх. Гэхдээ харьцангуй уянгын дуу дуулах сонирхолтой, дуртай байгаа нь онцлог болж болох юм болов уу.

-Ямар мэргэжилтэй вэ. Цаашид уран бүтээлчээр ажиллах уу. Дараагийн уран бүтээлийн төлөвлөгөө гарсан уу?

                -Би компьютерын инженерээр төгссөн. 2026 онд илүү идэвхтэйгээр уран бүтээлүүдээ гаргахаар төлөвлөсөн. Хүмүүст хэлэх болоогүй ч ирэх жил хийхээр төлөвлөсөн нэг том ажил бий. Сайн уран бүтээлүүдээр сонсогчидтойгоо уулзах төлөвлөгөөтэй байгаа.