“Тал нутгийн аялгуу” тоглолттой холбоотойгоор Улаанбаатар театрын уртын дуучин Оюунбаатарын Анхчимэгтэй ярилцлаа.

 -Танд энэ өдрийн мэнд хүргэе.Тал нутгийн аялгуу” тоглолт нь амжилттайгаар үргэлжилж байна. Сэтгэгдлээсээ хуваалцахгүй юу?

                -Энэ тоглолт маань Нийслэлийн засаг даргын тамгын газраас хэрэгжүүлж байгаа ажлын нэг юм. Бид  өөрийн байрандаа анх удаа тоглож байна. Мэдээж пиг дүүрэн үзэгчтэй биш ч яваандаа гадаад дотоодын хүмүүсийн зорьж ирж үздэг театр болно гэж бодож байна.

-“Тал нутгийн аялгуу” тоглолтын онцлог нь юу юм бэ. Таны хувьд хамгийн онцлог хэсэг нь аль нь вэ?

                -Монголчуудын эрт дээр үеэс уламжлагдан ирсэн ахуй амьдралын сэдвүүдийг 1 дор зохиомжлон харуулж буйгаараа онцлог гэж бодож байна. Тоглолтод орж буй номерууд бүгд л өөр өөрийн онцлогтой. Жишээ нь уртын дуу , хөөмий, уран нугаралт гэх мэт олон үзүүлбэрүүд байгаа. Тэдгээрийг ахуйтайгаа холбож харуулж буйгаараа онцлог юм

-Монголын нэрт зураач Б.Шаравын "Монголын нэг өдөр" бүтээлээс сэдэвлэсэн гэсэн. Монголын нэг өдөрт юуг багтаан харуулахыг зорьсон бол?

                -УБ театр энэ оны эхээр “Кармен” сонгодог гала тоглолт хийсэн.  Дараа нь “Монголын нэг өдөр” бүтээлээр сэдэвлэсэн “Тал нутгийн аялгуу” нэртэй ардын урлагийн “ Гала” концерт хийхээр зорьсон юм. Уг концерт Монголчуудын ахуй амьдралыг олон талаас нь харуулсан, дуу бүжиг, хөгжмийн цогц бүтээлүүдээс бүрдсэн найруулгатай. 2024 онд театр маань өргөжөөд ардын урлаг, сонгодог, этник чиглэлээр олон уран бүтээл хийж байна. Ардын урлагийн Гала концертыг намар тоглоно, одоо манай дээр тоглогдож байгаа Жуулчдад зориулсан тоглолтод “Тал нутгийн аялгуу” концертоос 2-3 дуу дуулагдаж байгаа.

-Таны тоглолтынхоо голлох уран бүтээлч нь гэж харж байна. Дүрийнхээ талаар ярихгүй юу?

                -Хос залуусын дүрийг гаргаж номер болгоны хоорондох холбоосыг ардын уртын дуугаараа холбож явж байгаа.

-Улаанбаатар театртаа хэзээ нэгдсэн бэ. Театрынхныхаа талаар ярихгүй юу?

                -2011 онд СУИС-ийн төгсөөд театртаа орсон. 13 дахь жилдээ театртаа ажиллаж, уран бүтээлээ хийж байна. 2021 онд Улаанбаатар театр болж хамт олон минь нэмэгдсэн. Сайхан хамт олонтой гар нийлүүлэн ажилладаг даа.

-Яагаад дуучин болохоор шийдсэн бэ. Тэр дундаа ардын дуу дуулах болсон шалтгаан бий юү ?

                -Сургуульд байхдаа хими, англи хэлний хичээлдээ их дуртай, олимпиадуудад ордог хүүхэд байсан. Есдүгээр ангид байхад манай дуу хөгжмийн багш “Яргуй” наадмын язгуур урлагийн төрөлд оролцох санал тавьсан. Багш намайг Хан Хэнтий чуулгын дуучин С.Нансалмаа багштай танилцуулсан. Багшийнхаа уртын дуу дуулж байгааг сонсоод үнэхээр нандин мэдрэмж авсан. Тэгж л уртын дуунд дуртай болсон доо.

-Тайзан дээр гараад дуулах үедээ авдаг сайхан мэдрэмжийнхээ талаар ярихгүй юу?

-Урлагийн хүмүүс тайзан дээр гараад айдас, догдлол мэдэрдэг байх. Миний хувьд анх театрын тайзан дээр гарчихаад зүрх хурдан цохилоод сандардаг байсан. Сандарч байгаа ч дуугаа илэрхийлж дуулахыг хичээдэг байж. Дараа дараагийнхаа тайзан дээр гарах тусам сандрал нь багасдаг.

-Анхны тайз, анхны уран бүтээл хэзээ байсан бэ. Тухайн үеийн мэдрэмжээсээ хуваалцахгүй юу?

                -Мэргэжлийн дуучин болоод гарсан хамгийн анхны тайз нь Улаанбаатар чуулганы тайз байлаа. Гэхдээ сумын төвийн жижигхэн модон тайз миний хамгийн анхны хөл тавьсан тайз байсан. Тайзан дээр байхдаа олон зүйлийг бодож, анхаарч байдаг. Юуны тухай дуулж байгаагаа, дуугаа хэрхэн үзэгчдэдээ хүргэхээ бодно. Тэр утгаараа олон мэдрэмж шаарддаг. Би Хэнтий аймгийн Батширээт сумынх нутгийнхан маань надад итгэж сүлд дуугаа дуулах боломж олгосон. Гуравдугаар курсийн оюутанд хамгийн сайхан мөч байж.

-Таны хувьд хамгийн дурсамжтай, тэр тайзан дээр гараад өөрөөрөө бахархсан үе бий юү. Яагаад онцгой байгаа юм бэ?

                -Морин хуурын чуулгатай буриад дуугаа дуулсан мөч хамгийн сэтгэл түгшээсэн. Өөрийнхөө дуулж байгаад бус ардаа тэр олон хүнийг суулгачихаад муу дуулчихвал яах вэ гэсэн бодол төрсөн. Мөн буриад дуугаа хүмүүст хүргэж байгаагаараа бахарсан.

-Гэр бүлд нь өөр дуулдаг хүн бий юү. Дуучин болоход нь гэр бүлийнхэн нь хэрхэн хүлээж авсан бэ?

                -Миний ээжийн талынхан их сайхан дуулдаг хүмүүс байдаг. Эмэгтэйчүүд нь их нарийхан хоолойгоор өндөр өнгө авч дуулдаг. Багаасаа буриад дуу сонсож өссөн болоод ч тэр үү одоо ямар ч буриад дуу, нугалааг нь сурчихдаг, заримыг нь мэдэж байдаг.

-Таны дараагийн зорилго төлөвлөгөө юу вэ?

                -Төлөвлөсөн ажил олон бий. Сайхан уран бүтээлүүд төлөвлөсөн. Бие даасан анхны тоглолтоо хийхийг зорьж байгаа.