Баруун Монголын аялга, ахуй амьдралыг арван жилийн дурсамжтай хослуулсан “Нусан багааяа” уран сайхны киноны ерөнхий найруулагч, гол дүрийн жүжигчин О.Анхсүхтэй ярилцлаа.

- Сайн байна уу. “Нусан багааяа” кинонд Анхаа нэрээрээ тоглосон. Дүр дээрээ хэрхэн ажилсан бэ?

     - Сайн байна уу. Бид нар 2008 онд арван жилийн хүүхдүүд байсан учраас тухайн цаг үеийн амьдрал, арван жилтэй төстэй. Тухайн цаг үеийн талаар гардаг. Давуу баруун монгол аялгыг ашиглаж Увс аймагт болж байгаа үйл явдлыг харуулсан кино. Дүр маань надтай ойрхон байсан. Арван жилдээ би дуугүй хүүхэд боловч найзууд дундаа дүрсгүй хүүхэд байсан. Бүтээсэн дүртэйгээ их ойрхон байсан.

- Яагаад баруун монгол аялгыг кинондоо оруулсан бэ?

     - Тэнд болж буй үйл явдлыг сонирхолтой болгохын тулд Увс аймгийг сонгосон. Манай Буянаа Увс аймагт арван жилээ төгссөн. Жүжигчдийн баруун монгол аялга, хэллэг дээр ажилласан. Бид нарын хувьд баруун монгол аялгаар ярьж, жүжиглэх бага зэргийн хүндрэлтэй байсан. Үгээ буруу хэлэх вий, хүмүүст буруу ойлголт төрүүлэх вий гэхээс эмээж байсан. Зөв үгийг сонгож хэрэглэхийг хичээсэн. Зураг авалт үргэлжлэх тусам сайжирсан.

- Та хэдэн онд СУИС-ийг төгссөн бэ?

    - Б.Буянтогтох бид хоёр 2015 онд СУИС-ийг Монгол Улсын Ардын жүжигчин Ж.Лхамхүү багшийн удирдлага дор жүжигчин мэргэжлээр төгссөн.

- ANBU production-ний хэд дэх уран бүтээл вэ?

     - Энэхүү “Нусан багааяа” кино “ANBU” production-ний хоёрдох уран бүтээл.

- Арван жилийн хүүхдүүдийн тухай кино шүү дээ. Гол дүрийн жүжигчдээ хэрхэн сонгосон бэ?

    - Бид баруун монгол аялгаа мэддэг жүжигчдийг сонгохыг хичээсэн. Жишээлбэл “Гала Цээгий” дүрд тоглосон Т.Бадамжав, “Ангийн дарга” Үзмээ нар Увс аймгийн гаралтай, жүжигчний мэргэжлээр төгссөн мэргэжлийн хүмүүс. Зохиолоо уншаад бид тухайн дүрд тохирох жүжигчдийг сонгосон. 

- Киноны бэлтгэл ажил хэдий хугацаанд үргэлжилсэн бэ?

      - Киноны бэлтгэл ажил 10-15 хоног үргэлжилсэн. Зураг авалт мөн 10-15 хоног үргэлжилсэн. Энэхүү уран бүтээл сарын хугацаанд бүтсэн. Б.Буянтогтохтой бид хоёр киноныхоо гол дүрд ажиллахаас гадна ерөнхий найруулагч, арын алба гээд бүх зүйлийг хийсэн дээ.

- Цахим сүлжээнд идэвхтэй контент хийдэг шүү дээ?

      - Тиймээ. Бид хоёр сургуулиа төгсөөд киноны арын албанд ажилладаг байсан. Дандаа хамт байдаг учраас бага багаар цахим сүлжээнд бичлэгээ хийж эхэлсэн. Өмнө бид “Нусан багааяа” гээд цахим сүлжээнд контент хийж байсан. Тэр контентаа дэлгэрүүлээд кино зохиол болгосон. Мөн “DOLGE ажиллагаа” кино контентоос бүтсэн. Бид контентноосоо санаа авч кино уран бүтээл хийж байгаа.

- ANBU production хэзээ үүсгэн байгуулагдсан бэ?

      - Манай production тамга, тэмдгээ аваад хийж байгаа анхны уран бүтээл “Нусан багааяа” МУСК. Өмнөх кинон дээрээ бид компани байгуулаагүй байсан.

- “Нусан багааяа” киногоороо юуг хүргэхийг зорьсон бэ?

     - Өв соёл, баруун монгол аялгыг үзэгчдэд зөвөөр суртчилахыг зорьсон. Монгол улсад олон ястан, үндэстэн байгаа тэдний нэг бидний хадгалж үлдэх ёстой өв соёл бол баруун монгол аялга юм шүү гэдгийг харуулахыг хичээсэн. Энэхүү кино хорин жилийн уулзалт болоод бүгд дурсамжаараа аялж байгаа тэр өнцгөөс харуулахыг хүссэн.

- Дараагийн уран бүтээлээ төлөвлөсөн байгаа юу?

     - Наадам гээд хэсэг амарч байгаа. Удахгүй дараагийн уран бүтээлээ есдүгээр сард хийнэ гэсэн төлөвлөгөөтэй байгаа. Тэр уран бүтээл маань “Нусан багааяа”-2 байж магадгүй.