Чингисийн есөн өрлөг жанжны нэг, түүнийг найман шарга адуугаа хулгайд алдчихаад эрж явахад тусалж анд бололцсон Боорчийг мэдэхгүй хүн үгүй. Тэгвэл энэ оны төгсгөлд Улсын дуурь бүжгийн эрдмийн театрын уран бүтээлчид “Тэнгэрийн элч" дуурийг шинээр тавьж буй юм. Ардын жүжигчин А.Энхтайваны хөгжим Д.Энхтуяагийн цомнолоор бүтсэн энэхүү дуурийг энэ амралтын өдрүүдээр тоглох байна. Үүнтэй холбогдуулан тус дуурийн Боорчийн дүрийг бүтээж буй ДБЭТ-ын дуучин Б.Батжаргалтай ярилцлаа. Бидний яриа түүний дүрийн онцлог, тэр дүрээ хэрхэн харж бэлдэж буй талаар эхэлсэн юм.

    Тэрбээр "Миний дүр бол Чингисийн есөн өрлөг жанжны нэг, Наху баяны хүү Боорчи. Та бүхэн сайн мэднэ. Тэмүүжинг найман шарга морио алдчихаад эрж явахад таарч хамтдаа ололцож анд болсон. Мөнхүү амийг нь аварч байсан. Тэмүүжин хожмоо "Намайг найман шарга адуугаа алдан явахад тэнгэрээс бууж ирж миний амийг аварсан "Тэнгэрийн элч юм" гэж хэлсэн байдаг юм билээ. Миний хувьд Боорчийг баян айлын хүүхэд атлаа элдэв зангүй, тусч сайхан сэтгэлтэй болж өсөөд, дайн тулаанд оролцож, баатарлаг гавьяа байгуулж бүх цэргийн жанжин болтлоо яаж өсөж дэвжсэн бэ гэдэг талаас нь харж буй. Мөн их сэтгэлийн хаттай. Айлын эрх хүүхэд гээд хойш суухгүй, юм болгонд өөрийгөө дайчилж, хурцалж байсан хүн юм байна гэж дүрийг нь бүтээх явцдаа олж харж байгаа. Энэ ч үүднээс энэхүү дууриар Боорчийн нөхөрлөл, сайхан сэтгэл, зан чанар гээд цөмийг нь харуулна" гэнэ.

     Харин энэхүү дүрд хэрхэн сонгогдсон тухайд асуухад "Боорчийн дүр бол эрэгтэй хүний нарийн цээл хоолой буюу тенор хоолой дээр бичигдсэн. Энэ нь хөгжмийн зохиолч маань өөрөө тенор хоолойтойтой холбоотой болов уу. Мэдээж дүр сонголтын тухайд бие хаа, дүр төрх харна" гэсэн юм.

"Тэнгэрийн элч" дуурийн бэлтгэл хоёр сарын өмнөөс эхэлжээ. Үргэлжлүүлэн бид Б.Батжаргал дуучны анх хэрхэн дуурийн мэргэжлийг сонгосон, хэзээнээс театрт ажиллах болсон тухай яриагаа өрнүүллээ.

     Энэ тухай "Дуучин мэргэжлийг сонгоход уран бүтээлч аав, ээж хоёр минь нөлөөлсөн. Аав минь ДБЭТ-ын дуучин, СТА Т.Баярсайхан, ээж минь Хилийн цэргийн дуу бүжгийн чуулга болон бүх цэргийн дуу бүжгийн чуулгад дуучнаар ажиллаж байсан СТА, Д.Бямбасүрэн гэж хүн бий. Миний хувьд СУИС-д анх 2007 онд элсэн ороод МУГЖ Д.Банди багш дээр сууриа тавьж байгаад Гавьяат жүжигчин Н.Ганхуяг багшийн удирдлагад суралцаж төгссөн. 2012 онд Дуурийн театрын найрал дуучнаар ороод, 2013 оноос гоцлол дуучнаар ажиллаж эхэлсэн. Дунд нь гурван жил хагасын хугацаанд Солонгосын Үндэсний урлагийн их театрт магистр хамгаалаад ирсэн. Театрт орсноосоо хойш 11 жил болж байна. Энэ хугацаанд арав гаруй гол болон туслах дүрд тоглосон" гэж байв.

Харин "Дуурийн дуучин байна гэдэг тайзан дээр дүрээрээ үхэж, сэхэж, баярлаж, гуньж амьдардаг. Дээрээс нь амьд хөгжимтэй дуулна гэдэг их гоё” гэж мэргэжлийнхээ сайхныг бидэнд өгүүлсэн юм.