Монгол төрийн үндэсний хөгжмийн их найрлаас үндэсний их баяр наадамд зориулсан "Монголын Сайхан Орон" тоглолтоо долдугаар сарын 11-нд үзэгч, сонсогчдодоо хүргэх билээ. Ингээд тус театрын уран бүтээлч, лимбэчин МУСТА Б.Батцэнгэлтэй ярилцлаа.

-Танд энэ өдрийн мэнд хүргэе. “Land of the Sky" тоглолт амжилттай тоглогдож байна. Сэтгэгдлээсээ хуваалцахгүй юу?

                -Тоглолт амжилттай сайхан үргэлжилж байна. Зуны 100 өдөр Монгол Улсыг зорьж ирсэн жуулчдадаа эх орныхоо онцлог бүхний харуулах тоглолтоо үзүүлж байгаад баяртай байна.

-Үндэсний их баяр наадамд зориулсан "Монголын сайхан орон" тоглолтоо тоглох гэж байна. Энэхүү тоглолтын онцлог нь юу юм бэ?

                -Монгол Улсынхаа түүхэн баяр наадмын үеэр эх орныхоо сайхныг харуулсан “Монголын сайхан орон” тоглолтоо үзэгчдэдээ хүргэхээр шургуу бэлдэж байна. Монголын сор болсон сонгодог бүтээлүүдийг тоглоно. Монгол хүн болж төрснөөрөө бахархах, сайхан аялгуунуудыг манай тоглолтоос сонсох болно.

-Үндэсний урлагийн их театр жил бүр жуулчдад зориулж тоглолт хийдэг юм билээ. Таны хувьд хэд дэх жилдээ оролцож байгаа вэ. Анхны оролцож байсан тоглолтынхоо талаар ярихгүй юу?

                -Театртаа 2013 онд нэгдсэн. Үндэсний төрийн их найралд лимбэ хөгжимчнөөр ажиллаж байна. Театртаа нэгдсэнээс хойш тасралтгүй жуулчдадаа зориулсан тоглолтод оролцож байна. Үндэсний урлагийн их театр энэхүү уламжлалт тоглолтоороо Монгол Улсынхаа бүх л сайхныг харуулдаг учраас оролцож байгаа уран бүтээлийн хувьд хамгийн сайнаараа үзүүлбэрээ үзүүлэхийг хичээдэг, тэр хэрээрээ сайхан мэдрэмж авч байдаг даа.

-"Land of the Sky" тоглолтын онцлог юу юм бэ. Таны хувьд хамгийн онцлог хэсэг нь аль нь вэ?

                -Монгол Улсынхаа бүх ястнуудын түүх соёл, бүжиг, дууг шингээсэн. Миний хувьд хамгийн онцлох шинэ гэрийн найраар дэмбээ, биелгээ, уртын дууны сайхныг харуулсан хэсэг байгаа.

-Лимбэ хөгжмийн онцлогийн талаар ярихгүй юу. Яагаад энэ хөгжмийг сонгосон юм бэ?

                -Дэлхийн болон Монголынхоо бүх л сонгодог бүтээлийг лимбэ хөгжим дээр эгшиглүүлж чаддаг. Монгол лимбэний ялгарах гол онцлог нь битүү амьсгал байдаг. Эрт үеийн уран дархнуудын үйл хийх тэр аргаас хөгжим рүүгээ шингээж авсан түүхтэй. Монгол Улсын консерваторт шалгуулж байхад МУГЖ М.Бадам багш “Чи лимбэ тоглох хүүхэд байна” гэж хэлээд хөгжмийн ангид оруулж байсан юм. Амьдралынхаа чигийн тун зөв заалгасан гэж боддог доо.

-Таны анхны тайз, анхны уран бүтээл хэзээ байсан бэ. Тухайн үеийн мэдрэмжээсээ хуваалцахгүй юу?

                -Монгол Улсын консерваторт шалгалт өгөх гээд хамгийн анх тайзан дээр гарсан даа. Тухайн үед шалгалт өгөх гэж байгаа болоод ч тэр үү айж, догдолж, сандарч байснаа санадаг.

-Монгол Улсын Үндэсний урлагийн их театр 150 гаруй хүний бүрэлдэхүүнтэй. Бүгд энэ тоглолтод оролцож байгаа шүү дээ. Бүрэн бүрэлдэхүүнээрээ тоглох ямар байна?

                -Бүрэн бүрэлдэхүүнээрээ тайзан дээр гарахаас гадна бидний тайзны уран бүтээлийг бэлддэг арын албанд 100 гаруй хүн ажилладаг. Бид ямар ч тоглолтод хамтын хүчээр ажилладаг. ҮУИТ-ын Төрийн их найрал 70 гаруй хүний бүрэлдэхүүнтэй бүх л тоглолтод хамтдаа оролцож, үндэснийхээ сайхан аялгууг үзэгчдэд хүргэдэг дээ.

-Хөгжмөө тоглож байхдаа юу мэдэрдэг вэ. Сонсогчдодоо юу мэдрүүлэхийг хичээдэг үү?

-Хамгийн эхэнд нэгнийгээ мэдэрч тоглодог. Тэр найралд байгаа хөгжимчин бүр нэгнийхээ хөгжмийг мэдэрч байж үзэгчдэд бидний хөгжим тусдаа биш нэг мэдрэмж өгөхөөр хүрнэ шүү дээ. Мөн тоглож байгаа уран бүтээлийнхээ илэрхийлэх гэсэн санааг хүргэхийг хичээнэ. Хөгжмийн зохиолын хүргэх гэсэн санааг хөгжмөөрөө дамжуулан “амилуулж”, үзэгчдэд хүргэнэ дээ.

-Таны хувьд хамгийн дурсамжтай, тэр тайзан дээр гараад өөрөөрөө бахархсан үе бий юү. Яагаад онцгой байгаа юм бэ?

                -Үндэснийхээ хөгжмийг тоглосон тайз бүр бахархалтай. Тэр бүр үнэ цэнтэй. Мөн гадаадын нэр хүндтэй тайзан дээрээс уран бүтээлээ хүргэх сайхан. Гэхдээ миний хувьд Үндэсний урлагийн их театрын тайз хамгийн нандин, хамгийн бахархмаар нь.

-Таны дараагийн зорилго төлөвлөгөө юу вэ?

                -Үндэснийхээ урлагийг залуустаа хүргэж, таниулах, өвлүүлэн үлдэхийг л эрмэлзэж байна даа.

-Ярилцлага өгсөн танд баярлалаа, тоглолтод нь амжилт хүсье.

                -Баярлалаа.