Түүний бүтээсэн ертөнцөд 11 ангийн турш саатаж, Бархастай хамт дүү нарынх нь төлөө тэмцэж, Содбаяртай хамт төслийг нь хэрэгжүүлэх гэж хичээж, Гэрэлмаа ахмадтай хамт үнэний төлөө мөрдлөг хийсээр “Гарц”олон ангит киног дуусгалаа. Залуу найруулагчийн бүрдүүлсэн баг үзэгчдийг цэнхэр дэлгэцийн өмнө тав дахь өдрийн үдэш бүр “уялаа”.

      “Фантастик” продакшны туслах найруулагч, “Falco” энтертайнментын найруулагч Б.Саруулбуянтай “Гарц” олон ангит киноных нь талаар ярилцсанаа хүргэж байна.

-"Гарц" олон ангит кино амжилттайгаар үзэгчдэд хүрч дууслаа, танд баяр хүргэе. Тус уран бүтээлийг анх яагаад хийхээр шийдсэн юм бэ?

         -“Гарц” киног 2020 онд хөл хорионд байх үедээ нэг ангит байхаар зохиолыг нь бичиж дуусгасан юм. Өнгөрсөн жил киноныхоо зохиолыг задалж олон ангит уран бүтээл болгосон. Би хүний хувь тавилан бичигдчихсэн байдаг гэдэгт итгэдэггүй. Бид хийсэн сонголт, гарц бүрийн нийлбэрээр амьдарч байгаа гэж боддог. Тэр нийлбэрүүд л биднийг бүтээдэг. Бүгд өөртөө зөв гэсэн замаар алхана. Тэр бүхний нийлбэр юунд хүргэж болохыг л харуулахыг зорьсон.

-Кинонд шинэ залуу жүжигчид ажилласан нь онцлог байсан. Мөн зарим дүрүүдийг анхнаасаа ажиллуулна гэж төлөвлөж, зохиолоо бичсэн гэж сонссон. Дүр сонголт дээр хэрхэн ажилласан бэ?

        -Тийм ээ, ер нь шинэ уран бүтээлчид ажилласан. Багаараа л дүр сонголт дээр их анхаарч, тодорхой хугацааг зарцуулсан даа. Зохиол хөгжүүлэлтээс эхлээд Гэрэлмаа ахмадын дүрээс Б.Одончимэг эгч л харагдаад байсан. Э.Содбаярын дүрд ч гэсэн илүү харизмтай, хүчтэй хүн хэрэгтэй байсан учраас Тодгэрэл ахыг сонгосон. Хамтарч ажилласан, уран бүтээлийг минь "амилуулсан" бүх жүжигчдэдээ баярлалаа.

-Эхний анги яагаад газар хөдлөлтийн мэдээгээр эхэлсэн нь төгсгөлийнхөө анги дээр тодорхой болсон шүү дээ. Киноны сцен бүр уялдаа холбоотой, логик дараалалтай харагдсан. Энэ талаар ярихгүй юу?

         -Ганцхан газар хөдлөлтийн хэсгээс гадна бусад зураг авалт  дээр ч үзэгчдэд "яагаад" гэдэг асуулт үлдээхгүйгээр уран бүтээлээ хийхийг зорьсон. Цаасны ажлаа сайн хийж байж зураг авалтдаа орсон л доо. Киноны хэсэг бүр үзэгчдэд киноны талаар ашигтай мэдээлэл өгөхгүй л бол байгаад хэрэггүй. Гарч байгаа зураглал бүр үзэгчдийг дараагийн хэсэг рүү хөтөлж байж кино илүү сонирхолтой болно шүү дээ. Газар хөдлөлтийн талаарх мэдээг ч зүгээр нэмчихээгүй. Бид тодорхой хэмжээнд судалгаа хийсэн. Монгол Улсад сүүлийн жилүүдэд газар хөдлөлтийн давтамж нэмэгдэж байгаа. Энэ талаар бага ч гэсэн дуугарахыг хичээсэн.

-Дүр бүхэн үүрэгтэй, бүгд илэрхийлэх ёстой мэдрэмж, түүхтэй. Гэхдээ тэр дундаас найруулагчийн хувьд хамгийн их ачаа үүрсэн дүр нь хэн бэ?

          -Ер нь бүх дүр дээр төвлөрч ажилласан. Тулга, Содбаяр, Гэрэлмаа, Бархасын дүр илүү их ачаа үүрсэн болов уу. Гэхдээ л дүр өөрийн гэсэн асуудал, зорилготой, зөрчилтэй байсан. Дүр бүрээр нь хөгжүүлж байж тэдний зорилго, мөн чанар, зорилгодоо хүрэхийн төлөөх алхмуудыг харуулсан. Тэдний зорилгын огтлолцол, зөрчлөөс үүдэж энэ кино бүтэж, илүү сонирхолтой болсон шүү дээ.

-"Гарц" олон ангит киног сунжруулж, ямар нэгэн хайрын романсыг харуулахыг хүсээгүй санагдсан. Найруулагчийн шийдэл байв уу?

        -Би жанраа алдахыг хүсээгүй ээ. "Гарц" бол гэмт хэрэг, адал явдалт төрлийн кино учраас тэр жанрыг барьж ажиллахыг хичээсэн. Мөн логик дараалалтай байлгахын тулд багаараа ажилласан. Хэрвээ үзэгчид дуртай гээд романс, хөгжилтэй хэсгүүдийг нэмчихсэн бол  илүү сунжирч, уйтгартай болох байсан байх. Энэ байдлаас л зугтахыг хичээсэн.

-Уран бүтээлчидээс нь "Гарц кинонд нэг ч эсрэг дүр байхгүй" гэж хэлсэн байсан. Таны хувьд үүнтэй хэр санал нийлэх вэ?

         -Би анхныхаа хувилбарыг ч эсрэг дүргүйгээр бичсэн. Тэдэнд өөрсдийн зорилго, хамгаалах зүйл байгаа. Багаараа "Энэ кинонд нэг ч эсрэг дүр байхгүйгээр хийнэ" гэж яриад эхэлсэн. Аль болох зорилгодоо хүрэхийг хичээсэн.

-Найруулагчаар ажилласан анхны уран бүтээлийнхээ талаар яривал?

          -Хамгийн анх туслах найруулагчаар "37-р точки" кинонд ажилласан. Тус уран бүтээлээс хойш "Фантастик" продакшндаа ажиллаж байгаа. "Миний үзэсгэлэнт дагуул" бол ерөнхий найруулагчаар нь ажилласан анхны уран бүтээл, "Гарц" хоёр дахь нь болж байна.

-Туслах найруулагчаар ажилласан анхны бүтээл нь том төсөл байсан байна шүү дээ. Тухайн үед ямар мэдрэмж төрж байв?

           -Олон ангит кинонд ажиллах бүх л туршлагыг тэндээс авсан даа. Ер нь кинонд яаж ажилладгийг ах нараасаа л сурсан. "37 дугаар точки" бол ажилласан уран бүтээлчдийгээ кинонд төлөвшүүлж, сургасан бидний хайртай уран бүтээл. Тус кинонд ажилласан арын албаны залуус  бие дааж уран бүтээл хийж эхэлсэн. Энэ нь л тус киног ямар чанартай гэдгийг харуулж байгаа юм.

-Яагаад найруулагч болохоор шийдсэн юм бэ?

             -Би уг нь жүжигчин, найруулагч болно гэж боддог хүүхэд байгаагүй. 19 насандаа гаргасан шийдвэр. Автозамын инженер болно гээд их сургуульд нэг жил сурчихсан байж байгаад миний хийх зүйл биш гэдгийг нь ойлгоод мэргэжлээ сольсон. "Гарц" олон ангит киноны ерөнхий зураглаачаар ажилласан Э.Бат-Эрдэнэ найз минь тэр үед СУИС-д сурдаг байлаа. Тэгээд сургуулийнхаа сонин сайхан бүхнийг ярина, тэр бүрийг нь сонссоор байгаад дуртай болсон. Хавар нь сургуулиа хаяад, намар нь хүссэн сургуульдаа элссэн дээ. Би одоо ч хараахан найруулагч болж амжаагүй байна. найруулагч болохын тулд суралцаж, хичээж байгаа. Миний хувьд бүх зүйл шинэ байна. "Зүрхний хилэн", "Байтаг богд" кинонд ажилласны дараа Б.Тамир ах залгаад "Ахынхаа туслах найруулагчаар ажиллах уу" гэсэн. Би их тод санадаг юм. Тэр мэдээг найзуудтайгаа хамт байхдаа сонссон. Тэд урлагийн хүмүүс биш учраас миний хэр их баярлаж байгааг ойлгохгүй шүү дээ. Туслах найруулагчаар ажиллах саналыг сонсоод дотроо их баярласан. Б.Тамир ах намайг зөв чиглүүлсэн гэж боддог.

-"Гарц" киног үзэгчид сайнаар хүлээж авч байгааг харсан найруулагчийн мэдрэмж ямар байсан  бэ?

            -Хүмүүс ам сайтай үзэх, эргэн тойрны хүмүүсийн баяр хүргэж байгааг сонсох, үзэгчдийн сэтгэгдэл эерэг байгааг мэдрэх сайхан байлаа. Ирсэн шүүмжүүдийг ч сайн ойлгож авсан. Үзэгчид сайнаар хүлээж авна гэдэг уран бүтээлчдийн хувьд хамгийн сайхан зүйл байдгийг ойлгосон.

-Эхний ангиуд болон төгсгөлийн ангийг үзэгчдэд хүргэх үеийн сэтгэл хөдлөлийг дурсвал?

           -Ёстой өөр мэдрэмжүүд, эхний ангиуд дээр "Яах бол" гэдэг бодол л төрдөг юм билээ. Багаараа суучихаад сандарч, догдолж, айсан. Кино дундаа орж хүмүүст хүрч эхэлсний дараа л жаахан амьсгаа авсан даа. Төгсгөлийн анги гарахад яг үзэгчидтэй адилхан мэдрэмж авсан. Төгсгөлийн ангиа хүлээлгэж өгөөд "Ингээд л дуусаж байгаа билүү" гэж бодогдсон. Анхны олон ангит кино болохоор тэр юм уу, их сонин мэдрэмж авсан.

-Сайхан уран бүтээлийн ард хамтдаа гарсан багийнхныхаа талаар ярихгүй юу?

           -"Гарц" киноны 500 гаруй сценийг 96 байршилд авсан. Энэ бүх зургийн ард амжилттай гарсан багийнхандаа баяр хүргэе, бүгдэд нь баярлалаа. Мөн киног маань дэмжсэн бүх хувь хүн, албан байгууллагуудад талархлаа.

-Ярианы төгсгөлд үзэгчдийн хамгийн их мэдэхийг хүсэж байгаа зүйлийг асуух нь зөв болов уу. "Гарц" олон ангит кинонд хоёрдугаар бүлэг гэж байгаа юу?

               -Одоогоор хоёрдугаар бүлэг гэж байхгүй. Гэхдээ цаашид юу болохыг мэдэхгүй шүү дээ.

-Ярилцлага өгсөн танд баярлалаа. Дараагийн уран бүтээлд нь амжилт хүсье