ЖҮЖИГЧИН Э.БИЛЭГТМАА: Нээлттэй, цоглог Билэгтмааг бодлогоширсон, чимээгүй Сарнайгийн дүр илүүтэй сорьсон

2024-04-29, 1617

"Орлон тоглогч" киноны Сарнайгийн дүрд тоглосон жүжигчин Э.Билэгтмаатай ярилцлаа.

-С.Амарсайхан найруулагчийн “Орлон тоглогч” киноны Сарнайгийн дүрд та тоглолоо. Үзэгчдийн хувьд өмнө нь харж байгаагүй шинэ содон дүр төрх байлаа. Анх найруулагч нь танд хэрхэн санал тавьсан бэ?

-Баярлалаа. Хүмүүс ихэвчлэн Сарнай гэж дуудаж байгаа. Миний анхны гол дүр. Амараа ахтай “Орлон тоглогч” киноноос өмнө “Хохирогч” кинонд мөн хамтран ажилласан. Гэхдээ киноны нэгээхэн хэсэгт л дээ. Тухайн үед гол дүрд мөн шалгуулж байгаад “Энэ удаад арай дөхөм биш байна, дараагийн уран бүтээлүүдэд эргээд холбогдоно” гэсэн. Үндсэндээ хоёр жил хүлээлтийн байдалтай, битүүхэндээ Амараа ахын уран бүтээлд орох сон гэдэг чин хүсэл мөрөөдөлтэй явж байлаа. Тэгсэн нэг өдөр надад Амараа ах “Ахад нь гоё зохиол байгаа. Чи ажиллаж чадах уу” гэдэг юм байна. Би ч ажиллах чин хүсэлтэйгээ хэллээ. “За ах нь зохиолоо бичиж дуусгаад холбогдоно” гэсэн. Түүнээс хойш сар гаруйн хугацаа өнгөрч, Алтан овооны тахилга дээр явж байсан чинь утас дуугараад, “Уран байна. Амараа найруулагч нь чамтай холбогд гэсэн. Би албан ёсоор жүжигчнийхээ багийг бүрдүүлж байгаа юм, хэзээ ирж уулзах боломжтой байна” гэдэг юм байна. Би ч хот руу очоод хамгийн түрүүнд залгахаа мэдэгдээд, хот ороод л очиж уулзлаа. Амараа ах надад өмнө нь туслах дүрд гэж ярьж байсан болохоор миний хувьд туслах дүрд тоглоно гэсэн л бодолтой байлаа. Тэгээд продюсер маань надад зохиолоо яриад, нэлээд удаа суусны дараа дүрээ асуусан чинь гол дүр гэдэг байгаа. Гайхаж, баярлах зэрэгцээд л хүлээн авч, үргэлжлүүлэн бид хоёр, гурван цаг дүрийнхээ талаар ярилцсан.

-Сарнайгийн дүрд таныг тохирно гэдгийг найруулагч нь харсан байж мэдэх юм. Энэ талаар танд хэлж байсан зүйл бий юү?

-Үүнээс өмнө "Хохирогч" киноны нэгдүгээр ангийн нэг сцен байдаг юм. Одоо ингээд бодохоор тухайн бүтээлд найруулагч маань туршиж харья гэж бодсон шиг байгаа юм. Тухайн сцен дээр Билэгтмаа гээд нэрээр минь бичсэн байсан. Уран бүтээлчийн хувьд сорьж, харахын тулд нэг сцен надад зориулж нэрээр маань бичсэнд би их талархаж, хүндэтгэн бодож явдаг. Жүжигчин хүний хувьд өөрийгөө нээх боломж олгож байна шүү дээ.

-Сарнай, Билэгтмаа хоёрын зан чанар ижил үү. Эсвэл огт өөр үү?

-Огт өөр. Магадгүй харагдах байдлын хувьд би Сарнайтай төстэй бодогдсон байж магадгүй. Сарнай бол цайвар цагаан царайтай, дундаж өндөртэй, харц нь жаахан бодлогоширсон эмэгтэй. Гэвч би тийм ч чимээгүй, бодлогоширсон хүн биш. Нэлээд сахилгагүй, адал явдалд дуртай, сониуч, нээлттэй хүн. Сарнай бол их дотогшоо, удаан бодож байж жинтэй хоёр, гуравхан үг хэлээд гараад явдаг. Тэгэхээр нээлттэй, цоглог Билэгтмааг чимээгүй, бодлогоширсон Сарнайгийн дүр их сорьсон.

-Мэдээж Сарнайгийн дүрээ гаргахын тулд дүрдээ ойрхон зан чанартай хүнийг ажиглаж, суралцсан болов уу. Бодит амьпрал дээр Сарнай шиг эмэгтэй олон шүү дээ?

-Тэгэлгүй яах вэ. Сарнайгийн дүрд төрсөн эгчийн маань араншин илүүтэй ойр бодогдсон. Эгч маань их бодож байж жинтэй үг хэлдэг, дотогшоогоо хүн л дээ. Энэ мэтээр дүртэйгээ ойр дөхөм зан чанартай хүнийг мэдээж харна.

-Зураг авалт дуусаад, кино үзэгчдэд хүрэхэд найруулагч, кино багийн зүгээс уран бүтээлчиддээ урмын сайхан үгийг хэлдэг болов уу. Зохиол дээр бодож бичсэн дүрийг нь сонгосон жүжигчин нь санаанд хүртэл амилуулна гэдэг найруулагч хүнд хамгийн том баяр жаргал байх. Энэ ч утгаар танд Сарнайгийн дүрийн тань тухайд юм хэлсэн үү?

-Миний хувьд найруулагчийнхаа бодсон Сарнайг бүтээчих юм сан гэж хичээсэн. Эхэндээ найруулагчийгаа их бухимдуулсан. Тэгээд зураг авалт дуусах тийш хандлаа. Найруулагчаасаа яг нэг болж байгаа эсэхээ асууж чадахгүй л эмээгээд явсан. Тэгж байгаад машин дотор хамт сууж явдаг хэсгийг авахад "Миний дүр яаж байна, таны бодож байсан Сарнайгийн дүрд хүрээгүй байх тийм ээ" гээд зориглоод асуусан чинь "Үгүй шүү дээ. Чи их сайн тоглож байгаа. Дүр чинь болж байна, дуу хоолойны өнгө чинь гоё. Жүжигчний хувьд болж байна. Зүгээр л чи байнга уран бүтээлд ажиллаагүй учир алдаа гарч байгаа. Тэр чинь яваандаа уран бүтээлүүдэд тоглосны дараа асуудалгүй болно. Найруулагч нь уураа тэр дор нь илэрхийлдэг, хатуу үгтэй байж магадгүй ч. дорхноо мартдаг” гэсэн. Тэрийг сонсоод ёстой дотор цэлмэх шиг л болсон.

-Нөгөө талаар найруулагчтайгаа хамтран тоглоход жүжигчнийх нь зүгээс олон зүйл сурсан байх?

-Хамтран тоглоход надад их нөмөртэй, нөөлөгтэй байсан. Туршлагатай уран бүтээлчтэй ажиллахаар өөрийн мэдэлгүй л урсаад л дүрдээ ордог, сцен дээр нэг их уддаггүй юм билээ. Б.Амарсайхан найруулагчийн сценээс сцений хоорондох шилжилтүүд нь үлгэр жишээ авам, суралцам байсан.

-Сургуулиа төгсөөд та нэлээд хугацаанд мэргэжлээрээ ажиллахгүй байж байгаад анхны гол дүрээ авсан гэсэн. Хүн бүрд өөрийн гэсэн цаг хугацаа байдаг гэдгийг та мэдэрсэн болов уу?

-Тийм ээ. СУИС-ийг Л.Дэмидбаатар багшийн удирдлагад сурч төгссөн. Сургуулиа төгссөнөөс хойш ангийн маань найруулагч аймгийн театрын найруулагч болж очоод, тэнд анхны жүжигт нь ажлаад явсан. Монголд жүжигчнээрээ ажиллах боломж, нөхцөлтэй байгууллагууд цөөн байдаг. Тэр ч утгаараа мэргэжлээрээ төдийлөн ажиллаж чадахгүй байсан. Үнэхээр аливаа зүйлийн цаг, тохироо бүрдэнэ гэж байдаг юм байна. Тиймээс залуучууддаа хандаж хэлэхэд, аливаад шантралгүй тууштай байгаарай гэж хэлмээр байна.

-Таны тоглосон киног гэр бүлийнхэн нь үзээд ямар сэтгэгдэлтэй байсан бэ?

-Ээж минь их сэтгэл өндөр байгаа. Охин нь тоглож байгаа учир намайг уйлбал дагаж уйлаад, инээвэл дагаж инээгээд л үзэж байгаа. Ээж минь мөн миний хамгийн том зөвлөгч, шүүмжлэгч шүү дээ. Хүү маань харин гаргаж байгаа эмоци, сэтгэгдэл бүрийг нь нарийн үзнэ. Үзэж байгаа киноных нь дүрд ээж нь тоглохоор хүүд минь их гоё санагддаг шиг байгаа юм.

-Жүжигчин мэргэжлийг яагаад сонгосон бэ?

-Ээж минь жүжигчин болоход их нөлөө үзүүлж байсан. СУИС-д сурахаас өмнө Соёлын дээд сургуулийн ардын хөгжмийн ангийн лицей сургуулийг төгссөн. Тухайн үед урлаг уран сайханд их л дуртай байсан. Ээж тэгэхэд “Жүжигчин болбол ямар уу” гээд санал болгоод, тайлбарлаж байсан. Тэгээд л шалгалт өгсөн. Намайг анх СУИС-д ороход их урам өгч авч байсан хүн бол Н. Ганхуяг багш. Анх шалгалт өгөхдөө жүжигчний талаар ямар ч мэдээлэлгүй, цэвэр сонсгол, дуулалтаа шалгуулж орсон.

-Одоо харин танд уран бүтээлийн санал хэр их ирж байна вэ?

-Санал ирж байна. Миний хувьд сайн баг хамт олон, уран бүтээлчидтэй ажилласан учир ирж байгаа уран бүтээлийн саналд их нухацтай хандаж байна. Сайн багтай хамтарч ажиллах юм сан гэж бодож байна.

-Та амьдрал болоод уран бүтээлдээ ямар зарчмыг баримталдаг вэ?

-Хүнд үнэнч байхыг их хичээж, боддог. Аливаад худлаа биш үнэн байхыг эрмэлздэг. Аль болох хэлсэн, ярьсандаа хүрч, өөрийгөө болон бусдыг хуурахгүй байхыг бодож явдаг.

-Ямар дүрд тоглохыг хүсдэг вэ?

-Сонгодог жүжигт тоглох сон гэж бодож явдаг. Мөн түүхэн кинонд тоглох хүсэлтэй.

-Ярилцсанд баярлалаа.

ЖҮЖИГЧИН Э.БИЛЭГТМАА: Нээлттэй, цоглог Билэгтмааг бодлогоширсон, чимээгүй Сарнайгийн дүр илүүтэй сорьсон

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2024-05-02 09:46:45

Naraa naraa narangerel : Бэтэ дээ юуны өмнө маш том халуун баяр хүргэе. Эгч нь чамаараа маш их бахархаж ээжийнхээ бахархал болж яваад талархаж байгаа шүү. Хэзээ нэгэн цагт чиний цаг үе ирнэ гэдэгт бидний 3 найз итгэдэг хүлээдэг байсан шүү. Амьдралын сорилт болгон чиний урагшлах зам гэж бодож харж, давж яваарай. АМЖИЛТ БҮХЭН ӨӨРИЙН ҮНЭ ЦЭНЭТЭЙ. БОСГО ӨНДӨРСӨХ ТУСАМД ЧИНИЙ ГАРАХ ӨНДӨРЛӨГ ТЭР ЧИНЭЭГЭЭР ӨНДӨРСӨЖ БАЙДАГ ТУЛ ХИЧЭЭГЭЭРЭЙ. ЧАМДАА АМЖИЛТ ХҮСЬЕ.
Сэтгэгдэл үлдээсэн: 2024-04-30 09:26:58

Нараа: 10 жилийн ангийн охин мундаг жүжигчин болжээ.Анхны гол дүрээрээ үзэгчдийг байлдан дагуулж байгаа болохоор хол явах "од"байна даа. Уран бүтээлийн улам их амжилт хүсье.