Кино урлагийн ертөнцөд авьяаслаг, залуу уран бүтээлч олноороо төрж байна. Тэр хэрээр сонин, содон, өвөрмөц, өөр өнгө төрхтэй дүрүүд үзэгчдэд хүрч буй. Энэ ч утгаар бид тэрхүү залуу уран бүтээлчдийн яриаг "Уран бүтээлчийн цаг" булангаараа дамжуулан уншигч танд хүргэж байгаа билээ. Бид энэ долоо хоногийн зочноороо "Мардай" киноны  Бурхан Ганбаагийн дүрд тоглосон залуу уран бүтээлч Б.Пүрэвдоржийг урилаа. Уншигч та анзаарсан бол тэр Монголын зэвүүн, час хийсэн гэмээр уран бүтээлүүдийн зэвүүн туслах дүрийг өөрийнхөөрөө чимхэж яваа уран бүтээлч. Урлагт эсрэг дүрийн өгөгдөлтэй, түүнийгээ тэгээд өөрийн биеэрээ бүрнээ илэрхийлдэг жүжигчдийг нэрлэвэл гарын арван хуруунд багтах байх. Тэгвэл тэр мундаг ах, эгч нарынхаа араас зугуухан урагшилж, хэзээ нэг өдөр бүр шүүрс алдам, дотроос урам, дотор сэрүүцүүлэм, өөрийгөө эвдсэн зэвүүн дүрийг бүтээхээр бэлтгэгдэж яваа гэдэг нь одоо тоглож байгаа, мөнхүү тоглосон уран бүтээлээс нь тодорхой харагддаг. Ингээд түүнтэй холбогдоход, кино зураг авалттай яваа гэсэн учир их ажлынх нь дундуур цөөн хором ярилцсанаа хүргэж байна. 

   -“Мардай” киног үзсэн хүмүүс таныг бурхан Ганбаагийн дүрээр таньж байгаа байх. Та манай уншигчдад өөрийгөө танилцуулаач?

    -Намайг Батсайханы Пүрэвдорж гэдэг. Архангай аймагт төрж, өссөн. Нийслэлийн тавдугаар сургуулийг төгсөж, 2009 онд КУДС-ийн жүжигчний ангид элсэн орж, 2013 онд төгссөн. Одоогоор СОБЫТ фильмд жүжигчнээр ажилллаж байна.

  -“Мардай” кино үзэгчдийн дунд их ам сайтай байна. Юуны өмнө баг хамт олонд нь баяр хүргэе.  Таны хувьд Этик продакшны хэд дэх уран бүтээлд тоглож байна вэ?

  -Баярлалаа. “Мардай” кино маань хоёр жилийн хугацаанд хийсэн өргөн цар хүрээтэй, олон хүний хөдөлмөр шингэсэн уран бүтээл. Энэ их хөдөлмөр, хичээл зүтгэлийн дараа танхим дүүрэн үзэгчтэй, үзэгчид ч сэтгэл хангалуун байгааг харахад баяртай байна. “Этик” продакшны уран бүтээлч ах нартайгаа нэг сургуулийн төгсөгчид. Энэ ч утгаар тус продакшныг байгуулагдсанаас хойш хийсэн кино, уран бүтээлд нь чадах чинээгээрээ оролцоод явахыг хичээдэг.

МАРДАЙ МУСК

  -Таны дүр их өвөрмөц, киноны зэвүүн дүрүүдийн нэг байна лээ. Өөрийн дүрийн талаар ярьж өгч болох уу. Кинонд дүрээс гадна ямар рольд ажилласан бэ?

   -Бусад төрлийн уран бүтээлийг бодоход түүхэн кино бол жүжигчин хүнээс маш их чадвар шаарддаг юм билээ. Энэ ч утгаар баримт судалгаан дээр суурьлаад, өөрийн дотроо төсөөлж бодсон дүрээ нэгтгэн Бурхан Ганбаа гэдэг дүрийг гаргаж ирэхийг зорьсон. Тухайн үед тус дүрд тоглохын тулд 20 килограмм турж байв.  Одоогоор миний тоглосон уран бүтээлүүдээс хамгийн мэргэжлийн чадвар шаардаж, чансаа сорьсон дүр гэвэл бурхан Ганбааг хэлэх байна.

   -Өмнө нь та мөн Этик продакшны уран бүтээлд ажиллаж байсан шүү дээ. Тэр дундаа “Цуурхал” киноны дүр нь их бас их сонин дүр байна лээ. Өмнө нь ер ямар, ямар уран бүтээлд тоглож байсан бэ?

       -Сургуулиа төгссөнөөс хойш чамгүй олон кинонд тоглосон байна. Тухайлбал, “Ноход”, “Хүний цаана”, “Цуурхал”, “Мам”, “Хуулиас гадуур”, “Баярлалаа ааваа” зэрэг уран бүтээлд тогложээ. Баг хамт болон ажилласан уран бүтээлчид, ажилласан дүр бүхнээсээ би их зүйлийг сурч, дараагийн уран бүтээл рүү гээ орох их урам зоригийг авдаг. Мөн алдсан алдаагаа дахин давтахгүйг хичээж, урагшлах тусмаа залруулаад явахыг зорьдог.

       -Таны уран бүтээлээс харахад та дандаа эсрэг дүрд тоглосон байна. Магад найруулагчид таныг эсрэг дүрд тохирох жүжигчин гэж хардаг болов уу?

       -Би сайн мэдэхгүй юм байна. Ер нь дандаа л эсрэг дүр таараад байдаг. Магад царайны төрх байдал нөлөөлдөг байх.

МАМ МУСК

   -Кино зураг авалттай яваа юм байна. Одоо ямар уран бүтээлд ажиллаж байна вэ?

    -Одоогоор манай СОБЫТ фильмийн “СОЛИЛЦОО” нэртэй шинэхэн кино маань тун удахгүй нээх гээд зав муутай л явна. Уран бүтээлч бид ингээд л нэг киногоос нөгөө рүү шилжиж, байнгын уран бүтээлийн эрэл хайгуул хийж явдаг юм.

              -ЖҮЖИГЧИН ХҮН БҮРТ ТОГЛОХЫГ ХҮСДЭГ ДҮР БАЙДАГ ШҮҮ ДЭЭ. ТАНЫ ХУВЬД ТИЙМ ДҮР БИЙ БОЛОВ УУ?

  -Онцлон тоглохыг хүсдэг дүр байхгүй ээ. Найруулагч  надад итгэж өгсөн дүрийг л сайн гаргахыг эрмэлздэг.

  -Таны хувьд яагаад жүжигчин мэргэжлийг сонгох болсон юм бэ?

    -Зарим уран бүтээлчдийн хувьд багаасаа урлагийн хүн болохыг хүсдэг байсан тухайгаа ярьсан байдаг. Миний хувьд багаасаа дурлаж, жүжигчин болно гэж боддоггүй байсан. Арван жилийн сургуулиа төгсөөд гэнэт л гаргасан шийдвэр. Одоо гэхдээ гэнэт гаргасан гээд айхтар харамсдаггүй. Харин ч урлагийн хүн болсондоо баяртай явдаг.

ЦУУРХАЛ МУСК

-Уран бүтээлчид нэгнээсээ их урам авч, нэгнээ их дэмждэг. Таны хувьд ямар уран бүтээлчээс үлгэр дууриалал авдаг вэ?

  -Мэдээж олон уран бүтээлч бий. Урлагийн ах нараа бүгдийг нь хүндэлж, суралцаж явдаг. Тэр дундаа онцолж хэлвэл, УДЭТ-ийн жүжигчин МУГЖ С.Болд-Эрдэнэ ахыг их хүндэлж, тоглосон уран бүтээлээс нь суралцаж явдаг. Хүнийхээ хувьд ч уран бүтээлч бидэнд их үлгэр дууриалалтай хүн.

-Цаашдын зорилго, хүсэл мөрөөдлөөсөө бидэнтэй хуваалцаач?

  -Залуу хүний хувьд бодож, төлөвлөсөн зүйл их байна. Энэ онд  хоёр ч уран бүтээлээр үзэгчдэдээ бэлэг барихаар ажиллаж байна.

    Гүн бодлогошрол, юу ч хийж мэдэх нүдний харц, үе үехэн ярвалзан, татваганах царай түүний тоглосон дүрүүдэд ихэд илрэх бөгөөд айхтар хичээсэн биш зүгээр л өөрөөрөө жаахан ширүүхэн тоглоход л тэр дүрээ гаргачихдаг гэмээр. Учир нь түүнд эсрэг дүрийн бүх өгөгдөл байгаа гэхэд буруу тодорхойлолт болохгүй болов уу. Магад найруулагч нар түүний царайны төрх, дүрээ гаргаж байгаа өнгө, төрхийг таньж, эсрэг дүр оноодог байх.  Эсрэг дүр уран бүтээлчээс илүү их ур чадвар шаарддаг гэдэг.  Түүнд илүү олон зэвүүн бөгөөд эгдүүцэл хүргэсэн жинхэнэ дүрд тоглохыг хүсэн ерөөж, тун удахгүй зэвүүнээс зэвүүн, бүр дуу алдаж, хүмүүс үзэн ядам эсрэг дүрээр гарч ирээсэй гэж хүсэж байна. 

ХҮНИЙ ЦААНА МУСК