"Парис-2024" олимпын наадмын марафон гүйлтийн төрөлд оролцох эрхээ авсан Б.Мөнхзаяа Хөнгөн атлетикийн улсын аварга шалгаруулах тэмцээний марафон гүйлтийн төрөлд гурван алтан медаль хүртжээ.

    Тэрбээр өнгөрсөн гуравдугаар сард Сөүл хотод болсон марафонд 2:24:45 гүйж олимпын эрх авч, Монгол Улсынхаа рекордыг дахин шинэчилсэн. Мөн “Рио-2016”, “Токио-2020” олимпын наадам, “Лондон-2017”, “Доха-2019” дэлхийн аварга шалгаруулах тэмцээнд эх орноо төлөөлөн амжилттай оролцож байсан билээ. Цаашлаад “Улаанбаатар марафон” олон улсын гүйлтийн тэмцээнд зургаа удаа, 3000, 5000, 10 мянган метр, хагас марафон, марафон гүйлтийн зайд Монголын дээд амжилтыг эзэмшдэг бөгөөд улсын аваргад 20 удаа түрүүлсэн амжилттай.

      Марафон гүйлтээр арав гаруй жил тууштай хичээллэж, тэмцээн, уралдаануудад орж байгаа бөгөөд ийнхүү энэ жил гурав дахь олимпдоо оролцохоор эрхээ аваад буй юм. Түүний дасгалжуулагчаар нөхөр нь 2017 оноос ажиллаж эхэлсэн байдаг. Багаасаа гүйх дуртай байгаагүй охин гүйлтийн тэмцээнд орсноор гүйх дуртай болж, есдүгээр ангиасаа эхлэн энэ спортоор эргэлт буцалтгүй хичээллэж, оргилд нь гарахаар тэмүүлж яваа.

          Б.Мөнхзаяа "Миний бүх юм марафон, гэр бүл. Намайг хамгийн жаргалтай, хамгийн тайван, хамгийн хүчтэй байлгадаг зүйл бол гүйлт. Гүйхгүй бол миний хувьд бүх юм зогсчих шиг утгагүй санагддаг. Бие мах бодь ч цаанаасаа хөдөлгөөн шаарддаг. Манай гэр бүлийн хувьд спортгүй, гүйлтгүй өдөр хоног гэж байгаагүй. Гүйх ямар гоё гэж санана. Гүйх амтанд нэг л орсон бол орхиж чаддаггүй. Бараг донтуулдаг гэсэн ч буруудахгүй. Тэгэхээр өөр ямар ч гоё мэргэжил, сайхан зүйл амласан энэ замаасаа би буцахгүй, бас хэзээ ч харамсахгүй" гэж ярьсан байдаг.