Дэлхийн хөнгөн атлетикийн холбооноос (World Athletics) өнөөдөр буюу 2024 оны зургадугаар сарын 5-ны өдөр "Парис-2024" зуны олимпын наадмын хөнгөн атлетикийн марафон гүйлтийн төрөлд оролцох тамирчдын нэрсийг эцэслэн зарлалаа. 

        Дэлхийн хөнгөн атлетикийн холбоо( World athletics), ОУОХ-ноос "Парис-2024" олимпод эрэгтэй, эмэгтэй тус бүр 80, нийт 160 тамирчин ( гэхдээ нэг улсаас эрэгтэй, эмэгтэй тус бүр гурваас илүүгүй) оролцох журам гаргасан. Эрэгтэйчүүд 2 цаг 08 минут 10 секунд дотор, эмэгтэйчүүд 2 цаг 26 минут 50 секунд дотор амжилт үзүүлсэн байх стандарттай аж.

        Оролцох стандарт буюу болзол биелүүлсэн тамирчдын тоо 80-аас цөөн байвал дэлхийн чансааны онооны дарааллаар олимпод оролцох марафончдын квотыг олгодог журамтай аж. Монголын тамирчин Бат-Очирын Сэр-Од 1169 оноогоор дэлхийн чансааны 80-д багтаж олимпын наадамд зургаа дахь удаагаа оролцох эрхээ авлаа.

      Б.Сэр-Од Хофү марафон ( 2:10:11), Осака (2:10:10) гүйж, өндөр оноо авч , 74-д бичигдэж байсан нь эцсийн дүнд нөлөөлжээ. Марафон гүйлтээр (42.195 км) олимпын наадамд зургаан удаа оролцсон түүх дэлхийд байхгүй. Тэгвэл энэ түүхийг монгол тамирчин 42 настай (10-р сард 43 нас хүрнэ) Б.Сэр-Од ийнхүү бичлээ.