Монгол Улсын Хөдөлмөрийн баатар, гавьяат тамирчин, “Бээжин-2008” олимпын наадмын аварга Э.Бадар-Ууганы төрсөн өдөр өнөөдөр тохиож байна. Тэрбээр 1985 оны энэ өдөр Улаанбаатар хотод мэндэлжээ. Нийслэлийн 97 дугаар дунд сургуулийг төгссөн бөгөөд 1998 оноос боксын спортоор хичээллэсэн. Боксын 54 кг-ын жинд тулалдаж байсан. 2008 онд олимпод анх удаагаа оролцож Монголын түүхэнд анх удаа боксын төрлөөр олимпын алтан медаль авсан билээ.

       Олимпын аварга, Э.Бадар-Ууган 2007 онд АНУ-ын Чикаго хотод болсон дэлхийн аварга шалгаруулах тэмцээнээс мөнгөн медаль авсан. 2007 оны Ази тивийн аварга, 2006 оны оюутны дэлхийн аварга, “Доха-2006” Азийн наадмын хүрэл медальтай. Мөн Герман Улсад болдог “Химийн цом” тэмцээний аварга,Туркийн Ахмад Комертийн нэрэмжит тэмцээний аварга, Чехийн Усти-над-Лабем хотод болдог олон улсын тэмцээний мөнгөн медальтай. Монгол Улсын 2007, 2008 оны “Шилдэг тамирчин”, 2008 оны “Дэлхийн шилдэг эрэгтэй боксчин”-оор шалгарч байсан юм.