Хөвсгөл аймгийн Цагаан-Үүр сумын харьяат улсын начин Г.Бат-Эрдэнийн ач хүү, улсын начин Б.Баттогтохын хүү, мэргэжлийн сүмогийн "Исэноүми" дэвжээний бөх Араүма Б.Төртогтох өнөөдөр албан ёсоор зодог тайлахаа зарлалаа.

        Б.Төртогтох Тоттори “Жохоку” ахлах сургуулийг төгсөөд, “Доошишия” их сургуульд суралцан, 2020 оны гуравдугаар сард төгссөн. Б.Төртогтох “Исэноүми” дэвжээнд элсэж, Араүма буюу эмнэг догшин морь нэрээр барилдаж байсан билээ. “Исэноүми” бол 1775 онд байгуулагдсан эртний дэвжээ юм. Уламжлал, ёс заншлаа хадгалан, гадаад бөх авдаггүй байсан бөгөөд Б.Төртогтох тус дэвжээний анхны гадаад сүмоч болжээ.

      Оюутан байх даа манай бөх Баруун Японы шинэ оюутны аварга шалгаруулах тэмцээнээс хүрэл, Баруун Японы оюутны аварга шалгаруулах тэмцээний 135 кг-д хүрэл медаль хүртэж, Бүх Японы сонирхогчдын сүмогийн тэмцээнд шилдэг наймд шалгарч байв. 2019 онд Бүх Японы оюутны аварга шалгаруулах тэмцээнд багийн дүнгээр хүрэл медаль авч байлаа.

         Араүма 27 настай. 2020 оны есдүгээр сараас мэргэжилд барилдсан. Гэмтэл бэртлийн улмаас зодог тайлж байна. Тэрбээр макүшита - 13 башё, 39 даваа, 45 унаа, долоо өнжсөн. Санданмэд таван башё, 24 – 11 – 0, жониданд хоёр башё, 10 – 4, жонокүчи зиндаанд нэг башё барилдаж 6-1-ийн амжилт үзүүлж байлаа.