Арабын Нэгдсэн Эмират Улсын Абу Даби хотод болж буй жүдо бөхийн 2024 оны ДАШТ-ийн гурав дахь өдрийн хэсгийн барилдаанууд өнөөдөр 14:50 цагаас эхэлнэ. Өнөөдөр эмэгтэйчүүдийн 70 кг, -78 эрэгтэйчүүдийн 90 кг-ын жингийн барилдаанууд явагдана. ДАШТ-ий эхний өдөр манай жүдочдоос ОУХМ Б.Баасанхүү дэлхийн аварга болж, ОУХМ Г.Наранцэцэг шагналт долдугаар байрт шалгарсан билээ. Харин ДАШТ-ий хоёр дахь өдөр ОУХМ Л.Анхзаяа хүрэл медаль хүртэж, МУГТ Л.Энхрийлэн V байр, М.Ичинхорлоо, Б.Эрхэмбаяр, Б.Эрдэнэбаяр нар шагналт VII байрт шалгарсан. ДАШТ-ий гурав өдөр барилдсан ОУХМ Б.Ганхайч, Г.Болор-Очир нар шигшээ наймын барилдаанд шалгарч чадаагүй.

       Өнөөдөр эмэгтэйчүүдийн 70 кг-ын жинд 47 тамирчин барилдана. Тус жинд манай улсаас дэлхийн чансааны 43-д эрэмбэлэгдсэн, өсвөр үеийн ДАШТ-ий хүрэл медальт, насанд хүрэгчдийн Ази тивийн аварга шалгаруулах тэмцээний хүрэл медальт, “Женко” клубийн 18 настай залуу тамирчин, ОУХМ Батсуурийн Ням-Эрдэнэ хүч үзнэ. Тэрбээр “D” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Коста Рикагийн Diana BRENES, Шведийн Ida ERIKSSON нарын хэн ялсантай барилдана.  

      Эмэгтэйчүүдийн -78 кг-ын жинд 41 жүдочин барилдана. Манай улсаас дэлхийн чансааны 29-д эрэмбэлэгдсэн, Ази тивийн аварга шалгаруулах тэмцээний хүрэл медальт, "Монголын жүдо академи", Үндэсний шигшээ багийн тамирчин, ОУХМ Отгонбаярын Хүслэн барилдана. Тэрбээр "С" хэсгийн нэгдүгээр тойрогт Габоны Karene Agono Wora-тай тааосан. Түүнийг буулган авч чадвал хоёрдугаар тойрогт Өмнөд Солонгосын Yoon Hyunji-тай барилдана

       Эрэгтэйчүүдийн 90 кг-ын жинд 50 тамирчин барилдана. Тус жинд манай улсаас дэлхийн чансааны 34-д эрэмбэлэгдсэн, Ази тивийн аваргын мөнгөн медальт, ОУХМ Гантулгын Алтанбагана хүч үзнэ. Тэрбээр “D” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Английн Jamal PETGRAVE, Өмнөд Солонгосын GWAK Donghan нарын хэн ялсантай барилдана.