АНЭУ-ын Абу Даби хотод жүдо бөхийн насанд хүрэгчдийн дэлхийн аварга шалгаруулах тэмцээн тавдугаар сарын 19-24-ний өдрүүдэд болж байна. Олимпын эрхийн оноо олгох тус тэмцээнд 107 орны эрэгтэй 349, эмэгтэй 309, нийт 658 тамирчин оролцож байгаа юм.  

       Манай улсаас 18 жүдоч хүч үзэж байна. ДАШТ-ий хоёр дахь өдөр эрэгтэйчүүдийн 73 кг-ын жинд Үндэсний шигшээ баг, “Женко” клубийн тамирчин ОУХМ Лавжаргалын.Анхзаяа, Бразилын бөх Даниэль Каргниныг нэмэлт цагт торгуулиар ялсанаар дэлхийн аваргаас хүрэл медаль хүртлээ. Дэлхийн шинэхэн медальтан болсон Л.Анхзаяа жүдо бөхийн ДАШТ-ээс Монголын баг тамирчдын 29 дэх медаль, 18 дахь хүрэл медалийг хүртлээ.

       Тэрбээр 73 кг-ын жингийн “D” хэсгийн нэгдүгээр тойрогт Живоутын Aden-Alexandre HOUSSEIN ялсан. Хоёрдугаар тойрогт Гүржийн олимп, дэлхийн аварга Lasha SHAVDATUASHVILI, гуравдугаар тойрогт Румыны Alexandru RAICU буулган авсан. Улмаар хэсгийн аваргын төлөө 2023 оны отгон дэлхийн аварга Швейцарийн Nils STUMP цэвэр ялсан. Хоёрны нэгийн финальд Японы Tatsuki ISHIHARA-д хожигдсон. Хүрэл медалийн төлөөх барилдаанд Бразилийн олимп, дэлхийн медальтан Daniel CARGNIN-ыг ялж ДАШТ-ээс хүрэл медаль хүртлээ.