Манай 3x3-ын сагсан бөмбөгийн баг Европ тивд супер шинэ гайхамшигтай түүхийг бүтээж чадлаа. Багийн спортоор монголчууд хэзээ ч амжилт гаргахгүй гэдэг гутранг үзэлтнүүдийг сэрээсэн сайхан тоглолтыг залуус маань  үзүүлэв. Гурван монгол залуу, дөрвөн хүний бүрэлдэхүүнтэй, шүүгчийн бүрэн хамгаалалт, дэмжлэгийг авсан Европын багуудыг сүүлийн мөч, эцсийн шүглийн дуу хүртэл чичрүүлж чадлаа. Сэлгээгүй, амралтгүй тоглосон манай гурав шөвгийн дөрвийн тоглолтод Францын багт 20:21-ээр, гуравдугаар байрын төлөөх тоглолтод Польшийн багт 20:22-оор хожигдлоо. Шүүлт шударга байсан бол манай баг олимпын эрхийг хүртэх боломжтой байсан.

        Манай багийн хувьд “Парис 2024” олимпын эрхийг “албан бус”-аар бол хэсгийн тоглолтод нэг ч хожилдолгүйгээр авчихсан гэж хэлж болохоор тоглолтыг хийсэн. Манай багийн хувьд дэлхийн аваргаас медаль авах, бүр цаашлаад олимпоос медаль авах хэмжээний баг гэдгээ бүрэн харуулж чадсан. Харин Олон улсын сагсан бөмбөгийн холбооны шүүгчид Европын багуудыг илт дэмжсэн шүүлтийг хийсэн. Тэр бүхнийг дэлхий нийт харлаа, үзлээ. Олимпын эрхийн тэмцээнд оролцсон Монголын багт хэсэгтээ хожигдсон Польшийн баг олимпын эрхийг хүртлээ. Мөн энэ тэмцээний өмнө Японд болсон олимпын эрхийн тэмцээнд Монголын багт хожигдсон Францын баг мөн л шүүгчдийн дэмжлэгтэйгээр олимпын эрхийг хүртэв.

         “Монгол харваач” А. Анандын үйлдэл хэмжээ хязгаарыг давсан гэж бандуулсан. Гэтэл сүүлийн хоёр тоглолтын шүүлт бүр арай л байлаа. Ялангуяа Польштой тоглодог тоглолтыг арай л дэндүү нэг талд хэвийсэн шүүлтийг шүүгчид хийлээ. “Монгол харваач” А.Анандыг тоглох эрхийг хассан ч “Дийлдэшгүй Монх”, “Монстер Дэк” хоёр манай багийн гол ноён нуруу тулгуур багана гэдгийг харуулж , шинэ домог, түүхийг бүтээв. Тэр хоёрын дутууг нөхөж О.Энхбаатар гайхалтай тоглолтыг хийсэн. Спорт шударга өрсөлдөөний талбар  байх ёстой. Шүүгчдийн дэмжлэгээр ялалтыг авдаг багууд бол спорт дахь авлига, хээл хахуулыг хөхүйлэн дэмжигчид юм. Монголчууд эцсээ хүртэл бууж өгөхгүй, тэмцэгчид байдгийг дэлхийн сагсан бөмбөг сонирхогч мянга, мянган хүүхэд, залууст үлгэрлэн харуулав. Жаахан амралт, жаахан хүч байсан бол хожих л байлаа  Хожлын дайтай, хожигдол монголын багийн ялалт байв.