Унгар Улсын Дебрецен хотод сагсан бөмбөгийн 3х3 төрөлд “Парис2024” олимпын эрх олгох сүүлчийн тэмцээн үргэлжилж байна. Энэ удаагийн тэмцээн олимпын гурван эрх олгохоороо онцлогтой. Манай улсаас эрэгтэй, эмэгтэй баг оролцож байгаа юм.

          Монголын эрэгтэй шигшээ баг хэсгийн сүүлийн тоглолтод хожил авч чадлаа. Тэд нэмэлт цагт Японы багийг 20:18-аар хожиж хэсгээ итгэл төгс тэргүүлэн хасагдах шатанд шалгарлаа. Монголын эрэгтэй шигшээ баг А.Анандын хожлын шидэлтээр нэмэлт цагт Японыг ийнхүү буулган авав. Одоо Израилийн багтай тулна.

          Манай баг  хэсгийн эхний тоглолтод Польшийн багийг 21:14-өөр, хоёр дахь тоглолтод Бельгийн багийг 21:17-оор хожсон билээ.  “Парис 2024” олимпын эрхийн төлөөх тэмцээний шилдэг найман багийн тоглолт 22:15 цагаас болно. Монгол Улсын эрэгтэй шигшээ баг “Парис-2024” олимпын эрх олгох тэмцээний хэсгийн тоглолтуудад нийт авсан оноогоороо бүх багийг тэргүүлж явна.

Монгол - 62 оноо

Франц - 60 оноо

Япон - 59 оноотой эхний гуравт явж байгаа.