Олон улсын хүндийн өргөлтийн холбооноос эмэгтэйчүүдийн 81 кг-ын жинд өрсөлдөх тамирчдын нэрсийг өчигдөр буюу тавдугаар сарын 15-ны өдөр эцэслэн зарласан байна. Энэ жингийн “топ 10”-т Ази тивээс хоёр тамирчин багтсаны нэг нь М.Анхцэцэг байжээ. Өнгөрөгч сард болсон олимпын эрхийн сүүлийн тэмцээний дараа манай тамирчны чансаа 13-т байсан юм.

      Зөвхөн арван тамирчинд "Парис 2024" тийз олгогдох байв. Хойд Солонгосын тамирчин жингээ тэргүүлж байгаа ч олимпод өрсөлдөхгүй. Ингээд эрхээ авсан зарим орны тамирчид энэ жингийг сонгоогүй учир М.Анхцэцэг X байрт бичигдсэнээр дөрөв дэх олимпын наадамдаа өрсөлдөхөөр болов.

      М.Анхцэцэг 16 насандаа "Nanjin 2024" залуучуудын зуны олимпын наадамд шагналт дөрөвдүгээр байрт орж олимпын гараагаа эхэлж байсан.  М.Анхцэцэг "Rio 2016"-д VIII байр, "Tokyo 2020"-т мeдальд нэг алхам ойртож IV байрт орсон билээ.

     Дэлхийн аварга, Монгол Улсын гавьяат тамирчин М.Анхцэцэг ийнхүү дөрөв дэх олимпын наадамдаа оролцохоор эрхээ албан ёсоор баталгаажууллаа. "Парис 2024" зуны олимпын наадамд оролцох Монголын багийн эрх дахин нэгээр нэмэгдэж, 18-д хүрлээ. Энэ долоо хоногийн багийн төрлөөр анх удаа олимпын эрх авч байсан 3х3 сагсан бөмбөгийн баг тамирчид "Парис"-ын эрхийн сүүлийн тэмцээнд оролцоно. Мөн марафоноор нэмэлт эрх хүлээж байгаа бол боксынхон мөн сүүлийн боломжийн төлөө тулалдана.