“Токио 2020” олимпын хүрэл, “Нур Султан 2019” ДАШТ-ий хүрэл медальт, “Женко” клубийн бөх, Монгол Улсын гавьяат тамирчин Бат-Очирын Болортуяа Ховд аймгийн Булган суманд 1998 оны энэ өдөр мэндэлжээ. Тэрбээр 2019 онд Казахстан Улсын нийслэл Нур-Султан хотод болсон чөлөөт бөхийн ДАШТ-ий эхний тойрогт Энэтхэгийн Лалитаг 10:3-аар ялсан. Шилдэг 16-д Пан Америкийн аварга шалгаруулах тэмцээний хүрэл медальт АНУ-ын Винчестерт хожигдсон. Харин дагах тойргийн барилдаанд Киргизстаны Мадина Надироваг  эхний үед 10:0-ээр оноогоор цэвэр ялсан юм. Улмаар дэлхийн аваргын хүрэл медалийн төлөө Туркийн Бедиха Гуныг 12:9-ээр буулган авч дэлхийн медальтан болсон  билээ.

      Харин “Токио 2020” олимпын наадмын хүрэл медалийн төлөө  Б.Болортуяа, Камеруны бөх, Африк тивийн долоон удаагийн аварга Т. Эссомбег 14:4-өөр оноогоор цэвэр ялж, олимпын медальтан болсон. Тэрбээр Эссомбетэй барилдахдаа эхний үед хоёр оноо алдсан ч, маш тайвнаар барилдаанаа үргэлжлүүлж, хүч мэхээр давамгайлан ялалт байгуулж, монголчуудын цорын ганц найдвар болж үлдэн, чөлөөтийнхний нэрийг хамгаалж чадсан юм. Ийнхүү тэрбээр чөлөөт бөхийн олимпын наадмаас 10 дахь медалийг, эмэгтэй тамирчдаас олимпын наадмаас медаль хүртсэн хоёр дахь бөх болсон билээ.