Казахстан Улсын нийслэл Астана хотод Олон улсын жүдо бөхийн холбоо, “IJF”-ийн “Астана 2024” гранд слам тэмцээн болж өндөрлөв. Тус тэмцээн тавдугаар сарын 10-12-ны өдрүүдэд болсон. Энэ удаагийн их дуулга тэмцээнд 84 улсын эрэгтэй 235, эмэгтэй 215, нийт  450 жүдочин хүч сорин өрсөлдсөн. Манай жүдочид “Астана 2024” гранд сламд амжилт үзүүлж чадалгүй, тааруухан оролцлоо. Хамгийн өндөр амжилтыг  эмэгтэйчүүдийн +78 кг-ын жинд барилдсан Д.Номинзул үзүүлэв.

        Дэлхийн чансааны 45-д эрэмбэлэгдсэн Дамбадаржаагийн Номинзул “А” хэсгийн нэгдүгээр тойрогт Энэтхэгийн Kanwarpreet  KAUR-ыг ялсан. Хоёрдугаар тойрогт Хорватын жүдочин Ivana SUTALO-г буулган авсан. Улмаар шигшээ наймд үлдэн “А” хэсгийн аваргын төлөөх барилдаанд Францын Romane DICKO-той барилдаж хожигдсон. Дагах тойргийн барилдаанд  ОХУ-ын Daria VLADIMIROVA-г ялж, хүрэл медалийн төлөөх барилдаанд мөн ОХУ-ын хоёр дахь бөх  Elis STARTSEVА-тай барилдсан.

         Манай бөх Д.Номинзул барилдааны эхнээс санаачлагыг авч үүрэх мэхийг тасралтгүйгээр хийж идэвхтэй барилдааныг гаргасан. Гэтэл дэвжээний шүүгч нэг талыг барьсан шүүлт хийж, Оросын бөхийг илт дэмжиж, манай бөхөд хуурамч довтолгоон хийсэн гэж гурван торгуулиар ялагдал өгөв. Ийнхүү тодорхой мэхний үйлдэл, барилдааны идэвх гаргаагүй ОХУ-ын тамирчин STARTSEVА “Астана 2024” гранд сламаас хүрэл медаль хүртэв. Д.Номинзулын барилдаан үнэхээр сайжирсан байна. Түүний үүрэх мэх, барьц байрлал давгүй болсон харагдлаа.