Чөлөөт бөхийн ДАШТ-ий хошой хүрэл медальт, Азийн наадмын аварга, Монгол Улсын гавьяат тамирчин Ганзоригийн Мандахнаран 1986 оны энэ өдөр Төв аймгийн Сэргэлэн суманд мэндэлжээ. Түүний чөлөөт бөхийн анхны багш нь Төв аймгийн Зориг багш юм. Зоригоо багш Г.Мандахнаранг өөрийн “жин жав” МУГД Ц.Хосбаяр, түүний дүү МУГТ Ц.Цогтбаяр нарт шавь болгон өгч дэлхийн зэрэглэлийн бөх болох эхлэлийг нь тавьсан байдаг.

         Г.Мандахнаран “Паттаяа 2009” Ази тивийн аварга шалгаруулах тэмцээнээс мөнгөн медөль хүртэж, улмаар “Гуанжоу 2010” Азийн наадмаас алтан медаль хүртэж, Азийн наадмын аварга болсон тэр цаг үеэс түүний тив, дэлхийн амжилтын буухиа эхэлсэн юм.

       Тэрбээр “Шинэ Дели 2013” Азийн аваргаас мөнгө, “Доха 2015” Азийн аваргаас мөнгө, “Бишкек 2018” Ази аваргаас хүрэл медаль хүртэж байлаа. Мөн “Будапешт 2013” ДАШТ-ээс хүрэл, “Ташкент 2014” ДАШТ-ээс хүрэл медаль хүртсэн. “Рио 2016” олимпын наадамд хүрэл медалиа луйвардуулан шагналт тавдугаар байрт шалгарч, олимпын түүхийн хуудаст арилшгүй нэгэн домог болон мөнхрөн үлдсэн бөх билээ.