Монгол Улсын гавьяат тамирчин Б.Сэр-Од "Парис-2024" олимпын эрхээ авлаа. Тэрбээр Дани Улсад болсон “Копенгагены марафон"-д 2:19:25 амжилтаар 14 дүгээр байр эзэлж олимпын марафонд уралдах эрхээ авсан байна. Манай тамирчин Афин, Бээжин, Лондон, Рио, Токио гээд таван олимпод дараалан хур хүч сорьсон. Б.Сэр-Од Парис-2024 олимпын наадамд өрсөлдөх эрхээ авч зургаа  дахь удаагаа дараалан олимпын наадамд өрсөлдөж нэгэн түүх бүтээж байна. Энэхүү эрх нь Монголын хөнгөн атлетикийн баг тамирчдын гурав дахь, Монголын багийн 14 дэх олимпын эрх юм.

        Копенхагены марафон нь “Парис 2024” олимпын эрх олгох сүүлчийн тэмцээн болж өндөрлөлөө. Тэмцээнд Монголын марафонч, ОУХМ Г.Хишигсайхан 2:28:48 цагийн амжилтаар IV байрт шалгарсан бол гавьяат тамирчин Б.Сэр-Од 2:19:25 цагийн амжилтаар XIV байр эзлэн Парисыг зорих эрхээ баталгаажуулж зургаа дахь олимпдоо оролцохоор боллоо.

         Харин Г.Хишигсайханы хувьд өнгөрсөн гуравдугаар сарын 3-ны өдөр зохиогдсон Токиогийн марафонд 2:26:32 цагийн амжилтаар VIII байрт шалгарч олимпын эрхээ авсан билээ. Мөн өнгөрсөн гуравдугаар сарын 18-ны өдөр болсон Сөүлийн марафонд Б.Мөнхзаяа 2:24:45 цагийн амжилтаар шилдэг 10-т шалгарч олимпын эрхээ аваад буй. Ийнхүү “Парис 2024” олимпын наадмын марафоны төрөлд Монголын гурван тамирчин, хурд, хүч, тэсвэр хатуужил, ур чадвараа сорихоор боллоо.