Бөхийн сонгомол барилдааны шигшээ баг тамирчид дасгалжуулагч С. Мөнхсүхээр удирдлуулан Ази тивийн аваргын эхний өдрөө барилдлаа. Энэ өдөр барилдсан бөхчүүдээс 130 кг-ын жинд хүч сорьж буй сонгомол барилдааны шигшээ багийн тамирчин, Төв аймгийн Эрдэнэсант сумын харьяат, “Алдар” спорт хороо, “Эрхэм хүслэн” Констракшны тамирчин Б. Ганзолбоо хүрэл медалийн төлөө хүч сорихоор боллоо.

         Түүний өрсөлдөгч 2023 оны бөхийн сонгомол барилдааны Ази тивийн аваргын мөнгө, “Ханжоу-2022” Азийн наадмын мөнгөн медальт Хятадын Мэн Лин Же байх юм. Манай тамирчин Б.Ганзолбоо эхний тойрогт Тажикистаны бөх Эдуард Бабеношевтой барилдаж, 9:8-ын харьцаатай эн тэнцүүхэн өрсөлдөж байх үед өрсөлдөгч тамирчин нь гэмтэж барилдаанаа дуусгасан. Ингэснээр манай тамирчин анхны ялалтаа авсан юм.

          Харин дараа нь Өмнөд Солонгосын бөх Ким Минсёкод 5:1-ийн харьцаатай ялагдаж, улмаар дагах барилдаанд шилжиж, финалын шатанд хүрэл медалийн төлөө Хятадын бөх Мэн Лин Жэтэй өрсөлдөхөөр боллоо.