Биеийн тамир, спортын улсын хороо, Монголын үндэсний бөхийн холбоо, “Мөнгөн цагариг” клуб хамтран зохион байгуулж буй бөхчүүдийн сагсан бөмбөгийн аварга шалгаруулах тэмцээн Спортын төв ордны “А” зааланд энэ сарын 1-4-ний өдрүүдэд үргэлжилнэ.

         Бөхчүүдийн дунд 15 дахь удаагаа зохион байгуулагдаж буй тэмцээний “А “хэсэгт улсын цолтой болон аймаг, цэргийн арслан цолтой 12 баг, “Б” хэсэгт аймаг, цэргийн заан, харцага, начин цолтой 12 баг өрсөлдөж байна.

          Тэмцээний нээлтийн ёслол өчигдөр 17:00 цагт боллоо. Бөхчүүдийн сагсан бөмбөгийн тэмцээн мөн ур чадварын болон гурван онооны шидэлтийн тэмцээнээр үргэлжлэх юм. Тус тэмцээнийг Биеийн тамир, спортын салбар үүсэж хөгжсөний 100 жилийн ойг тохиолдуулан зохион байгуулж байгаа билээ.

          Тэмцээнд улсын аварга О.Хангай, арслан Э.Оюунболд, гарьд Ц.Бямба-Отгон, заан Б.Пүрэвсайхан, Б.Бат-Өлзий, харцага Ш.Пүрэвгарьд, Х.Гантулга, Г.Бадрах нар байна.

         Одоогоор Өвөрхангай, Архангай, Увс, Завхан, Сүхбаатар, Булган аймгийн багууд хожил авсан. Энэ тэмцээн анх 2003 онд болоход дархан аварга Г.Өсөхбаяр ахлагчтай Архангай аймгийн баг түрүүлж байжээ. Харин хамгийн сүүлд 2019 онд болоход улсын гарьд Ж.Бат-Эрдэнэ ахлагчтай Говь-Алтай аймгийн баг түрүүлж байв.