Сагсан бөмбөгийн 3х3-ын  Ази тивийн аваргаас Монгол Улсын эрэгтэй, эмэгтэй баг хүрэл медаль хүртсэн гайхалтай өдөр өчигдөр байлаа. Харин энэ өдөр Монголын сагсан бөмбөгийн 3х3 төрлийн “Загалмайлсан багш” Монгол Улсын гавьяат дасгалжуулагч, Сүхбаатарын Тулга мэндэлжээ. Монголчууд багийн спортоор амжилт гаргахгүй гэдэг гутранг үзэл, хэлц үг шахуу болтолоо бидний толгойд гүн суусан байсан цаг саяхан.

           С.Тулга тэр гутранг үзлийг орвонгоор нь эргүүлж, Монголын 3х3 сагсан бөмбөгийн багийг бүх насны ангилалд тив дэлхийд гаргаж ирсэн гавьяатан билээ. Тэрбээр дэлхийд Монголын сагсан бөмбөгийн спортын хөгжлийг танилуулж, 3х3-ын тив, дэлхийн тавцанд Монголын сагсан бөмбөгийн спортыг тамгалан үлдээсэн анхдагч яах аргагүй мөн. С.Тулга багш дэлхийд үнэлэгдсэн сагсан бөмбөгийн “Монгол хувилбар” тоглолтын арга барилыг бий болгож чадсан. Мөн тэрбээр олон улс, тив, дэлхийд танигдсан олон сагсчдыг төрүүлж гаргасан билээ.