Өмнөд Солонгосын Сөүл хотноо 79 орны 40 мянга орчим гүйгчийг хамарсан марафон гүйлтийн томоохон тэмцээн болж өндөрлөлөө. Тус тэмцээнд Кени, Этиопоос эхлээд марафон гүйлтийн төрөл өндөр хөгжсөн дэлхийн шилдэг орнуудын гүйгчид энэ удаа оролцсон байна.

          Манай улсаас Монгол Улсын 20 удаагийн аварга, “Улаанбаатар марафон”-ын зургаан удаагийн аварга,  улсын рекорд дээд амжилтыг эзэмшигч, ОУХМ Б.Мөнхзаяа уралдаж, долдугаар байр эзэлсэн амжилтаар олимпын эрхийн болзол биелүүлжээ.

        Эмэгтэйчүүдийн 42 км 195 мeтр зайг Б.Мөнхзаяа 2:24:45 цагт туулсан амжилтаар шилдэг аравт шалгарсан цор ганц Ази тамирчин болов. Тэрбээр олимпын эрхээ биелүүлээд зогсохгүй өөрийнхөө тогтоосон Монголын дээд амжилтыг энэхүү марафонд дахин шинэчилсэн байна. Б.Мөнхзаяа дасгалжуулагч Б.Доржпаламын хамтаар БНСУ-д бэлтгэлээ базаасан нь үр дүнгээ өгчээ.

        Ийнхүү одоогоор Монголын хоёр эмэгтэй марафонч олимпын эрх аваад байна. Марафоны тамирчдын хувьд эмэгтэйчүүд 2:29:30, эрэгтэйчүүд 2:11:30 цагийн дотор амжилт үзүүлсэн байх ёстой.