Польш Улсын Якушице хотноо өнгөрсөн сард зохион байгуулагдсан биатлоны Европ тивийн аварга шалгаруулах тэмцээний 15 км зайн төрөлд түрүүлж, биатлон төгс утгаараа хөгжсөн Европын орнуудын гайхширал, бахархлыг төрүүлсэн Монгол Улсын зэвсэгт хүчний алба хаагч, дэд ахлагч Э.Энхсайхан  эх орондоо иржээ.

           Европын залуучуудын аварга, Азийн аварга алба хаагчийг Монгол Улсын Биатлоны шигшээ багийнхан болон зэвсэгт хүчний 326 дугаар ангийн захирагч дэд хурандаа Ү.Уянгасайхан, спорт сонирхогчид угтан авч, баяр хүргэсэн байна. Дэд ахлагчийн Польш Улсад үзүүлсэн энэхүү амжилт нь Монгол Улсын биатлоны спортын анхдагч гэдгийг Монгол Улсын Биеийн тамир, спортын улсын хорооноос албан ёсоор зарласан байна.