Дэлхийн триатлоны холбооноос өвлийн триатлоны чансааг 2024 оны гуравдугаар сарын 4-ний даваа гарагт шинэчлэн зарласан байна. Энэхүү дэлхийн чансаанд Монгол Улсаас есөн тамирчин шинээр нэмэгдэж, нийтдээ Монголын 11 триатлонч багтах боллоо.

         Өвлийн триатлоны УАШТ-ээс хүрэл медаль хүртэж, чансааны 85.56 оноо хүртсэн Нямбуугийн Алтаншагай  305.19 оноотойгоор дэлхийн чансааны “топ-10” руу орж ирлээ. Тэрбээр “Харбин-2024” дэлхийн цомд шагналт V байрт шалгарч 219.63 оноогоор анх дэлхийн чансаанд анх багтсан юм.

          Мөн “Харбин-2024” дэлхийн цомын шагналт Лувсандаваагийн Баярцэнгэл 203.16 оноогоор XV байрт байгаа бол УАШТ-ий алтан медальт Б.Ачбадрах 100 оноогоор XXVIII, УАШТ-ий дэд аварга А.Хүслэн 92.5 оноогоор 29 дүгээрт бичигдлээ.

         Түүнчлэн тухайн орны аварга шалгаруулах тэмцээний эхний таван байрын тамирчид оноо авдаг журмын дагуу Т.Амарсанаа 79.15 оноогоор 31 дүгээрт, Г.Энхнасан 73.21 оноогоор 33 дугаар чансаанд байгаа билээ. Монголын таван эмэгтэй тамирчин мөн дэлхийн чансааны жагсаалтанд анх удаа багтсан бөгөөд тэдгээрийг танилцуулвал:

Н.Энхжин 100 оноогоор 19 дүгээрт

Х.Отгонтэнгэр 92.5 оноогоор 20 дугаарт

Д.Отгонзул 85.56 оноогоор 22 дугаарт

Ю.Туяа 79.15 оноогоор 24 дүгээрт

Ж.Халиунаа 73.21 оноогоор 25 дугаарт.