Энэ өдөр Монгол Улсын Гавьяат дасгалжуулагч Цэнхэржавын Хосбаяр мэндэлжээ. Монголын хүндийг өргөлтийн спортын хөгжил, тамирчдын амжилт түүний хөдөлмөр, зүтгэлтэй салшгүй холбоотой. Үндэсний шигшээ багийн дасгалжуулагчаар 2012 оноос хойш ажиллаж буй тэрбээр Монголын эмэгтэй хүндийн өргөлтийн спортыг дэлхийн тавцанд гаргаж ирсэн гавьятан билээ.

           Монгол Улсын гавьяат тамирчин, дэлхийн аварга, ДАШТ-ий алт, хүрэл медальт, Ази тивийн аварга, “Алтан охин” хэмээх М.Анхцэцэгийн амжилтын ард Цэнхэржавын Хосбаяр хэмээх энэ эрхэм бий.

         Түүний нэрэмжит өсвөр, залуучууд, насанд хүрэгчдийн хүндийг өргөлтийн тэмцээн энэ сарын 26-27-ны өдөр СХД-ийн спорт зааланд болж байна. Энэ тэмцээнийг Монголын хүндийг өргөлтийн холбооны түүхт 68 жилийн ой болон "Парис-2024" олимпын бэлтгэл ажлын хүрээнд зохион байгуулж байгаа юм.