Мэргэжлийн сумогийн дэвжээнээ домог болсон 38 настай Хакүхо М.Даваажаргалын нэр хүнд түүний дэвжээний бөх Хокүсэйхо Э.Даваанинжийн зарим үйлдэлтэй холбоотойгоор сэвтэж, дэвжээний багшийнхаа тушаалаас эрэмбэ буурч магадгүй байдалтай тулгараад байна.

        Харин 22 настай Хокүсэйхог зодог тайлахыг Японы сумо бөхийн холбоо шаардах төлөвтэй байгаа бололтой. Маргааш буюу хоёрдугаар сарын 23-нд энэ асуудлыг авч хэлэлцэхээр тогтсон байна. Хокүсэйхог дэвжээнийхээ эрэмбэ доогуур залуу бөхчүүдэд байнга гар хүрдэг гэх хэрэгт сэжиглэж, буруутгажээ.

          Хокүсэйхо бол таван настайдаа Монголоос Японы Хоккайдод гэр бүлийнхээ хамт очиж амьдарсан хүүхэд. Түүнийг Хакүхо ирээдүйд сайн сумоч болно гэж дэвжээндээ авсан юм. Тэгвэл байдал өөр тийш эргэж, итгэсэн багшийнхаа алдар нэрийг сэвтүүлж, албан тушаалын эрэмбийг нь бууруулахад хүргээд байна.

         Хакүхог дэвжээндээ хяналт муу тавьсан, шавь нараа зөв хүмүүжүүлж, удирдаж чадаагүй гэж буруутгаж байгаа юм. Тиймээс хоёр сарын цалинг хоёр дахин бууруулахын зэрэгцээ оякатагийн эрэмбийг нь доошлуулах бололтой. Ийнхүү Японы Эзэн хааны цомыг 45 удаа гардсан домогт ёкозүна болон түүний монгол шавьтай холбоотой шуугиан дэгдээд байна.