Сэлэнгэ аймгийн Ерөө сумын Дааган дэл хэмээх газар мөсөн сурын олон улсын нээлттэй харваа хоёр дахь жилдээ сар шинийн өмнөхөн болсон байна. Энэхүү “Eruu cup” олон улсын тэмцээний цуваа харваанд ОХУ-ын Буриад , Хятадын Өвөр Монгол, Монгол Улсын өнцөг булан бүрээс 150-аад харваач оролцож, онч мэргэнээ сорин өрсөлджээ.  

      Монгол Улсын Засгийн газраас 2023-2025 оныг Монголд зочлох жил болгон зарлах тухай тогтоол, Сэлэнгэ аймаг 2024 оныг “Аялал жуулчлал, ногоон хөгжлийг дэмжих жил” болгон зарласан жилийн хүрээнд өвлийн аялал жуулчлалын шинэ эвент бий болгох, хөгжүүлэх зорилт тавьжээ.

     Монголын  үндэсний соёлын үнэт өв сангийн нэгэн хэсэг болсон мөсөн сурын харвааг Монгол хүний бие бялдар оюун ухаан, ёс суртахууныг төлөвшүүлэх, олон улсад түгээн дэлгэрүүлэх зорилгоор Сэлэнгэ аймгийн Ерөө сумын ИТХ-аас санаачилсан байна.

     Дээрх үйл ажиллагааг Сэлэнгэ аймгийн Байгаль орчин, аялал жуулчлалын газар, Сэлэнгэ аймгийн Ерөө сумын ИТХ, ЗДТГ, Монголын мөсөн сурын холбоо, Ерөө сумын “Хан буурагчингийн мэргэд" харваачдын холбооноос хамтран зохион байгуулжээ.