Хүндийн өргөлтийн 2024 оны Азийн аварга шалгаруулах тэмцээн Узбекистан Улсын нийслэл Ташкент хотод зургаан өдрийн турш үргэлжилж байна. Азийн аваргад Монголын 14 тамирчин оролцохоор бүртгүүлсэн бөгөөд өчигдөр буюу зургаа дахь өдөр, эмэгтэйчүүдийн 76 кг-ын жинд Отгончимэгийн Төгс-Эрдэнэ мөнгөн медаль хүртлээ.

       Тэрбээр огцом өргөлтийн эхний оролдлогоороо 92 кг өргөсөн бөгөөд хоёр дахь оролдлогоороо 96 кг захиалсан ч өргөж чадалгүй. Гэвч сүүлийн оролдлогоороо 97 кг-ыг өргөж мөнгөн медалийн болзол хангасан байна. Огцмоор Хойд Солонгосын тамирчин 111 кг өргөж алтан медаль хүртсэн бол Киргизстан Улсын тамирчин 97 кг өргөж мөн мөнгөн медаль авчээ. Харин Иран, Ливаны тамирчид 96 кг өргөж хүрэл медаль хүртсэн байна.

       О.Төгс-Эрдэнэ түлхэлттэй өргөлтөөр эхний оролдлогоор 110, хоёр дахиар 117 кг өргөсөн ба сүүлийн захиалгаа 120 кг аар өгсөн ч амжилт олоогүй. Түлхэлттэй өргөлтөөр Хойд Солонгосын тамирчин 125 кг өргөж хоёр дахь алтан медалиа авсан бол Ираны тамирчин 124 кг мөнгө, Киргиз, Ливаны тамирчид 122 кг өргөж хүрэл медаль хүртжээ.