Чөлөөт бөхийн Үндэсний шигшээ багийн сонгон шалгаруулалт болж, шигшээ багт орсон бөхчүүд гэрээгээ үзэглэсэн. Харин 2024 оны УАШТ-д жиндээ түрүүлсэн ч шигшээ багт орж чадаагүй тамирчид сэтгэл гонсгор байна. Зарим нэг тамирчид түрүүчээсээ ялгаварлан, гадуурхаж шигшээ багт авсангүй гээд үзэл бодлоо сошиалд илэрхийлээд эхэллээ.

           Дэлхийн бөхийн нэгдсэн холбоо, чөлөөт бөхийн ДАШТ-ийг олимпын болон олимпын бус жингийн ангилал гэгчээр зохион байгуулан явуулах болсон билээ. Тэр цаг үеэс хойш энэ маргаантай асуудал улс бүрийн шигшээ багийн сонгон шалгаруулалтын өмнө тулгарч буй хүндрэл, маргаан дагуулсан асуудал болоод байгаа.

          БТСУХ-ны Үндэсний шигшээ багийн алба, Монголын чөлөөт бөхийн холбоо, Үндэсний шигшээ багийн тамирчдыг сонгон, шалгаруулахдаа ялгавартай байдлаар хандсан нь маргаан үүсгэж, бөхчүүдийг гомдоох шалтгаан болчихлоо. Олимпын бус жингийн тамирчдыг анхаасаа шигшээ багт авахгүй гэсэн заалтаа баримталсан бол ийм маргаан үүсэхгүй байсан байх.

          Гэтэл олимпын бус зарим жингийн тамирчдыг шигшээ багт авсан нь маргааны гол үндэс болчихоод байна. Тамирчдад ийм ялгаварлан гадуурхсан, тэгш бус ялгавартай байдлаар хандаж болохгүй. Шигшээ багийн сонгон шалгаруулалтын дүрэм, журмаа тодорхой, ойлгомжтой, шударга, ил тод байдлаар явуулах ёстой. Шигшээ багийн дасгалжуулагчид давуу эрхээр өөрийн шавь нараа шигшээ багт авдаг шударга бус байдлыг үгүй хиймээр байна.