Узбекистан Улсын нийслэл Ташкент хотод хүндийн өргөлтийн насанд хүрэгчдийн Ази тивийн аварга шалгаруулах тэмцээн үргэлжилж байна. Азийн аваргын эмэгтэйчүүдийн 64 кг-ын жинд өрсөлдсөн Үндэсний шигшээ баг, “Аврагч” спорт хороо, “Дархан Хан спийд” компанийн тамирчин  ОУХМ Г.Ануужин мөнгөн медаль хүртжээ. Тэрбээр огцом өргөлтөөр 91 кг-ыг өргөж мөнгөн медаль хүртсэн байна. Харин 2024 оны УАШТ-д 95 кг-ыг огцомдож байсан билээ. Ийнхүү Г.Ануужин гурван жил дараалан тивийн аваргын медалийн тавцанд зогслоо.

         Ази тивийн аварга, ОУХМ Г.Ануужин Азийн аваргаас 2022 онд хүрэл медаль, 2023 онд алтан медаль, 2024 онд мөнгөн медаль хүртээд байна. “Парис-2024” зуны олимпын наадмын эрхийн оноо олгох тивийн аваргын өрсөлдөөнд Гавьяат дасгалжуулагч Ц.Хосбаяр, дасгалжуулагч Б.Дэнсмаа нарын удирдлага дор 14 тамирчин улсаа төлөөлөн оролцож байгаа.

         Эмэгтэйчүүдийн 49 кг-ын жинд Б.Тунгалаг, 59 кг-д Азийн аваргын мөнгө, хүрэл медальт Э.Энхтамир, 64 кг-д Ази тивийн аварга Г.Ануужин, Б.Хонгорзул, 71 кг-д залуучуудын ДАШТ-ий хүрэл, өсвөрийн Азийн аваргын алт, мөнгө, хүрэл медальт О.Төгс-Эрдэнэ, А.Содгэрэл, 81 кг-д дэлхийн аварга, ДАШТ-ий хошой мөнгө, нэг хүрэл медальт, дэлхийн цомын аварга, Азийн аваргын алтан медальт, гавьяат тамирчин М.Анхцэцэг, -87 кг-д А.Баясгалан нар 2024 оны Азийн аваргад өрсөлдөж байгаа юм.Харин эрэгтэйчүүдийн 61 кг-д М.Очир-Эрдэнэ, 67 кг-д А.Ананд, Э.Дүүрэнжаргал, 81 кг-д С.Цэнгүм, 96 кг-д Б.Цолмон, +109 кг-д М.Бахберген нар хүч үзэж байна.