Францын Улсын Парис хотод болж байгаа жүдо бөхийн их дуулга тэмцээн өнөөдөр хоёр дахь өдрөө үргэлжилнэ. Өнөөдөр манай улсаас эмэгтэйчүүдийн 63 кг-ын жинд ОУХМ Болдын Ганхайч, залуу тамирчин Цэгмидийн Энх-Оргил, 70 кг-д ОУХМ Саранцэцэгийн Лхагвадулам, ОУХМ Батсуурийн Ням-Эрдэнэ, эрэгтэйчүүдийн 73 кг-ын жинд ОУХМ Батзаяагийн Эрдэнэбаяр, 81 кг-д Гэрэлтуяагийн Болор-Очир нар барилдана.

           Б.Ганхайч 63 кг-ын “С” хэсгийн нэгдүгээр тойргийн барилдаанд Узбекистаны Sevinch ISOKOVA-тай таарсан. Түүнийг ялах юм бол хоёрдугаар тойргийн барилдаанд Чехийн Renata ZACHOVA-тай барилдана. Энэ жингийн “А” хэсгийн нэгдүгээр тойрогт залуу тамирчин Ц.Энх-Оргил, Бразилын Nauana SILVA-тай барилдана. Ялах юм бол хоёрдугаар тойрогт Италийн Agnese ZUCCO-той таарна.

           Б.Ням-Эрдэнэ 70 кг-ын “С” хэсгийн нэгдүгээр тойрогт гоц мөргөж ялалт авсан байгаа. Хоёрдугаар тойргийн барилдаанд Узбекистаны Shokhista NAZAROVA, Ирландын Rachael HAWKES нарын хэн ялсантай барилдана. Энэ жингийн “А” хэсгийн нэгдүгээр тойрогт С.Лхагвадулам Пуэрто Рикогийн  Maria PEREZ-тай таарсан. Хэрэв түүнийг ялж чадвал хоёрдугаар тойргийн барилдаанд Японы Shiho TANAKA-тай барилдана.

         Эрэгтэйчүүдийн 73 кг-ын жингийн “А” хэсгийн нэгдүгээр тойрогт Б.Эрдэнэбаяр гоц мөргөн ялалт авсан. Хоёрдугаар тойргийн барилдаанд Аргентины Tomas SOSA-тай таарсан. Түүнийг ялах юм бол гуравдугаар тойрогт Узбекистаны Murodjon YULDOSHEV, Италийн Gabriele SULLI нарын хэн ялсантай барилдана.

          Г.Болор-Очир 81 кг-ын жингийн “D” хэсгийн нэгдүгээр тойргийн барилдаанд Катарын Khalil REBAHI-тай барилдана. Хэрэв түүнийг ялах юм бол хоёрдугаар тойргийн барилдаанд Канадын Francois GAUTHIER DRAPEAU-тай таарна.