Катарт болж буй Азийн цомын тэмцээний 1/8 шигшээ тоглолтод Роберто Манчинигийн дасгалжуулж буй Өмнөд Солонгосын хөл бөмбөгчид, Саудын Арабын шигшээ багийг торгуулийн цохилтоор буулган авснаар шөвгийн наймд шалгарлаа.

        Мягмар гарагт Эр-Райян хотын "Эдьюкейшн Сити" цэнгэлдэх хүрээлэнд болсон 1/8-ийн шигшээ тоглолтын үндсэн цаг болон нэмэлт хоёр үе 1:1-ийн харьцаагаар дуусжээ. Саудын шигшээ багаас Абдулла Радиф тоглолтын 46 дахь минутад гоолдсон. Өмнөд Солонгосын шигшээ багийн довтлогч Чо Гю Со (90+9) нэмэлт цагт гоолын  харьцааг тэнцүүлсэн байна. Торгуулийн цохилтод Өмнөд Солонгосын хөл бөмбөгчид 4:2 -оор илүүрхэн ялалт байгуулав. 

         Өмнөд Солонгосын шигшээ баг Азийн цомын тэмцээний хагас шигшээд шалгарахын төлөө Австралийн багтай өрсөлдөнө. Тус тэмцээний аварга баг хоёрдугаар сарын 10-ны өдөр тодорно.